പ്രളയത്തിൽ വീട് തകര്‍ന്നു; പുതിയ വീടിന് വിനീത് തറക്കല്ലിട്ടു

കൊച്ചി: പ്രളയം തകർത്തെറിഞ്ഞ വീടുകളെ പുനർനിർമ്മിക്കുക എന്ന ലക്ഷ്യത്തോടെ ആരംഭിച്ച "ചേരാം ചേരാനല്ലൂരിനൊപ്പം " എന്ന പദ്ധതിയിലെ മൂന്നാമത്തെ വീടിന് മലയാളിയുടെ അഭിമാനമായ സി.കെ വിനീത് തറക്കല്ലിട്ടു. എറണാകുളം നിയോജക മണ്ഡലത്തിൽ ഹൈബി ഈഡൻ എംഎൽഎ നടപ്പിലാക്കുന്ന "തണൽ" ഭവന പദ്ധതിയിൽ ഉൾപ്പെടുത്തി ലുലു ഫിനാൻഷ്യൽ ഗ്രൂപ്പ് മാനേജിംഗ് ഡയറക്ടർ അദീബ് അഹമ്മദാണ് മൂന്നാമത്തെ വീട് സ്പോൺസർ ചെയ്തിരിക്കുന്നത്.


ചേരാനല്ലൂർ പഞ്ചായത്ത് 13-ാം വാർഡിൽ കല്ലുങ്കൽ ബെന്നിയുടെ വീടാണ് നിർമ്മിക്കുന്നത്. ലുലു ഫിനാൻഷ്യൽ ഗ്രൂപ്പിനെ പ്രതിനിധീകരിച്ച് ഡയറക്ടർ (ഇന്ത്യ) മാത്യു വിളയിൽ പങ്കെടുത്തു. ഐ.എസ്.എൽ ഫുട്ബോൾ നടക്കുന്നതിന്റെ ആവേശത്തിലായിരുന്നു നാട്ടുകാർ. കേരള ബ്ലാസ്റ്റേഴ്സിന്റെ ജഴ്സിയണിഞ്ഞ കുട്ടിപ്പടയും ഉണ്ടായിരുന്നു. സി.കെ വിനീതുമൊത്ത് സെൽഫിയെടുക്കാനും ഓട്ടോഗ്രാഫ് വാങ്ങാനുമെല്ലാം അവർ മത്സരിച്ചു.