വികസനം പാപമല്ല; മനോഭാവം മാറണം: പിണറായി വിജയന്‍

തിരുവനന്തപുരം: വികസന കാര്യത്തില്‍ കേരളത്തിന്‍റെ മനോഭാവം മാറണമെന്ന് മുഖ്യമന്ത്രി പിണറായി വിജയന്‍. ടൈംസ് ഓഫ് ഇന്ത്യ ദിനപത്രത്തിന്‍റെ ഗസ്റ്റ് എഡിറ്ററായി എത്തിയപ്പോഴാണ് മുഖ്യമന്ത്രിയുടെ പരാമര്‍ശം.

ഭൂരിഭാഗം ഉദ്യോഗസ്ഥരും വികസന പദ്ധതികള്‍ക്ക് ഒപ്പമാണ്. വളരെക്കുറച്ച് ആളുകള്‍ എതിരാണ്. ഇത് ഇവരുടെ പ്രശനമായി കരുതുന്നില്ല. പൊതുവെയുള്ള മനോഭാവത്തിന്‍റെ പ്രശ്നമാണ്.

വികസനകാര്യത്തില്‍ കേരളം മറ്റു സംസ്ഥാനങ്ങളെ ശ്രദ്ധിക്കണമെന്ന് മുഖ്യമന്ത്രി വിജയന്‍ പറഞ്ഞു. വികസന പദ്ധതികള്‍ വരുമ്പോള്‍ മറ്റു സംസ്ഥാനങ്ങളിലുള്ളവര്‍ വ്യത്യസ്‍തതകള്‍ മറന്ന് പൊതു വികസനത്തിനായി ഒന്നിക്കും. ഈ ഒന്നിപ്പ് ഒരു സംസ്‍കാരത്തിന്‍റെ ഭാഗമാക്കാന്‍ കഴിയണം - അദ്ദേഹം പറഞ്ഞു.

2011ല സെന്‍സസ് അനുസരിച്ച് നയങ്ങള്‍ക്കുള്ള 15-ാം ശമ്പളക്കമ്മീഷന്‍ റിപ്പോര്‍ട്ട് സംസ്ഥാനത്തെ ബാധിക്കുമെന്ന് പിണറായി വിജയന്‍ പറഞ്ഞു. മുന്‍ വര്‍ഷങ്ങളിലെ നേട്ടങ്ങള്‍ക്ക് കേരളത്തെ ശിക്ഷിക്കരുത്. അര്‍ഹമായത് കേരളത്തിന് ലഭിക്കണം. 2011ലെ കണക്കുകള്‍ അനുസരിച്ച് ഇത് സാധ്യമല്ല.

കേരള പോലീസ് ചെയ്യുന്നത് പ്രശംസനീയമായ ജോലിയാണെന്നും പിണറായി പറഞ്ഞു. അടുത്ത് തന്നെ തെളിയിക്കപ്പെട്ട കേസുകളില്‍ പോലീസിന്‍റെ കഴിവ് തെളിഞ്ഞതാണ്. പക്ഷേ, ഈ സംവിധാനത്തിലുള്ള പഴകിയ നയങ്ങള്‍ ആണ് പ്രശ്‍നങ്ങള്‍ക്ക് കാരണം. കസ്റ്റഡി മരണങ്ങള്‍ക്ക് പോലീസുകാര്‍ക്ക് നേരെ കേസ് എടുക്കാന്‍ മുന്‍പ് ഏത് സര്‍ക്കാരാണ് തയാറായിട്ടുള്ളതെന്നും പിണറായി വിജയന്‍ ചോദിച്ചു.