സിഎം രവീന്ദ്രൻ ചോദ്യം ചെയ്യലിനായി ഇഡിയ്ക്ക് മുന്നിൽ ഹാജരായി

കൊച്ചി: മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സിഎം രവീന്ദ്രൻ എന്‍ഫോഴ്സ്മെന്‍റ് ഡയറക്ടറേറ്റിന് മുന്നിൽ ഹാജരായി. കൊച്ചി ഇഡി ഓഫീസിലാണ് രവീന്ദ്രൻ ചോദ്യം ചെയ്യലിന് ഹാജരായിരിക്കുന്നത്. ഇഡി അയച്ച നാലാമത്തെ നോട്ടീസിന് ശേഷമാണ് രവീന്ദ്രൻ ചോദ്യം ചെയ്യലിന് ഹാജരായത്.

കഴിഞ്ഞ മൂന്ന് തവണ നോട്ടീസ് ലഭിച്ചപ്പോഴും ആരോഗ്യ പ്രശ്നങ്ങൾ ചൂണ്ടിക്കാട്ടിയായിരുന്നു രവീന്ദ്രൻ ചോദ്യം ചെയ്യലിൽ നിന്നും മാറി നിന്നത്. ആദ്യ തവണ കൊവിഡ് ബാധിച്ചതിനാലാണ് ഹാജരാകാനാകാതിരുന്നത്. പിന്നീട് രണ്ട് തവണ കൊവിഡാനന്തര ആരോഗ്യപ്രശ്നങ്ങളെത്തുടർന്ന് ആശുപത്രിയിൽ ആയതിനാലും ചോദ്യം ചെയ്യലിനെത്തിയില്ല.

Also Read : നനഞ്ഞ മണ്ണിലും കുഴിക്കാനാകാതെ യുഡിഎഫ്; പ്രതീക്ഷ പാളി ബിജെപി; വിവാദങ്ങൾക്കിടയിലും ജയം ഇടതിന്

നേരത്തെ എന്‍ഫോഴ്സ്മെന്‍റ് ഡയറക്ടറേറ്റിന്‍റെ നോട്ടീസ് ചോദ്യം ചെയ്ത് സിഎം രവീന്ദ്രന്‍ ഹൈക്കോടതിയിൽ ഹർജി നൽകിയിരുന്നു. ഇതിൽ കോടതി വിധി പറയാനിരിക്കെയാണ് അദ്ദേഹം ചോദ്യം ചെയ്യലിന് ഹാജരായത്. കൊച്ചിയില്‍ വിളിച്ചു വരുത്തി ചോദ്യം ചെയ്യാനുള്ള നോട്ടീസ് സ്റ്റേ ചെയ്യണം എന്നാവശ്യപ്പെട്ടായിരുന്നു ഹർജി.

Also Read: പുതിയ അംഗങ്ങളുടെ സത്യപ്രതിജ്ഞ 21ന്; മാർഗനിർദേശം പുറത്തിറക്കി, മേൽനോട്ടം ജില്ലാ കളക്‌ടർമാർക്ക്

താന്‍ കേസിലെ സാക്ഷി മാത്രമാണെന്നും പ്രതിയല്ലെന്നും രവീന്ദ്രന്‍ കോടതിയിൽ വാദിച്ചിരുന്നു. കൊവിഡ് ബാധിതനായതിനെത്തുടർന്നുള്ള അസുഖങ്ങള്‍ ഉണ്ടെന്നും കൂടൂതൽ സമയം ചോദ്യം ചെയ്യാന്‍ അനുവദിക്കരുതെന്നും ഹര്‍ജിയിൽ ആവശ്യപ്പെടുകയും ചെയ്തിരുന്നു.