'കേരള മോഡല്‍'; ദേശീയ ചാനലില്‍ ഹീറോ ആയി പിണറായി വിജയന്‍, വൈറല്‍

കൊറോണയെ തുരത്താനുള്ള പിണറായി സര്‍ക്കാരിന്റെ തന്ത്രങ്ങളെ പ്രകീര്‍ത്തിച്ചുകൊണ്ട് ദേശീയ ചാനല്‍. രാജ്യത്തെ ഏറ്റവും കൂടുതല്‍ കൊവിഡ് ബാധിതരുള്ള സംസ്ഥാനങ്ങളിലൊന്നായ കേരളത്തിലെ ആരോഗ്യ രംഗത്തിന്റെ മികവിനെ ദേശീയ ചാനല്‍ എടുത്തു പറയുന്നു. മുഖ്യമന്ത്രി പിണറായി വിജയനെയും ഉള്‍പ്പെടുത്തിക്കൊണ്ടുള്ള പ്രത്യേക കൊറോണ സംവാദ പരിപാടിയില്‍ ഇന്ത്യയിലെ മറ്റു സംസ്ഥാനങ്ങളേക്കാള്‍ ഒരു പടി മുന്നിലാണ് കേരള സര്‍ക്കാരെന്ന് പറയുന്നു. ഇന്ത്യ ടുഡെ അവതാരകനും പ്രശസ്ത മാധ്യമപ്രവര്‍ത്തകനുമായ രാജ്ദീപ് സര്‍ദേശായി പറഞ്ഞത് ഇന്ന് കേരളം ചിന്തിക്കുന്നത് നാളെ ഇന്ത്യ ചിന്തിക്കട്ടെ എന്നാണ്.

ഇന്ത്യ ടുഡെ പരിപാടിയില്‍ പിണറായി നല്‍കിയ അഭിമുഖവും മലയാളികള്‍ സോഷ്യല്‍ മീഡിയയില്‍ വൈറലാക്കുകയാണ്. 21 ദിവസം നീണ്ടു നില്‍ക്കുന്ന സമ്പൂര്‍ണ്ണ അടച്ചിടലില്‍ എങ്ങനെയാണ് ജനങ്ങള്‍ക്ക് ഭക്ഷണവും അടിസ്ഥാന സൗകര്യങ്ങളും നല്‍കാന്‍ കഴിയുന്നതെന്നായിരുന്നു അവതാരകന്റെ ചോദ്യം. എന്നാല്‍, പിണറായി വിജയന്‍ ആ ചോദ്യത്തിന് മറുപടി നല്‍കിയത് ഇങ്ങനെയാണ്: 'ഈ സാഹചര്യത്തെ നേരിടാന്‍ ഞങ്ങള്‍ സര്‍വ്വസജ്ജമാണ്. മൂന്ന് മാസത്തിലധികം ഉപയോഗിക്കാനാവശ്യമായ ഭക്ഷണസാധനങ്ങള്‍ക്കും അടിസ്ഥാനസൗകര്യങ്ങളും ഞങ്ങളുടെ കൈവശം ഉണ്ട്', മുഖ്യമന്ത്രിയുടെ വാക്കുകള്‍.

മുഖ്യമന്ത്രി പിണറായി വിജയന്‍ വിളിച്ചുചേര്‍ത്ത വാര്‍ത്താ സമ്മേളനത്തില്‍ പറഞ്ഞ പ്രസ്താവനകള്‍ ഉള്‍പ്പെടുത്തിയിട്ടുണ്ട്. കേരളത്തെ പിടിച്ചുകുലുക്കിയ നിപയെ അതീജിവിച്ച കേരളം മറ്റെല്ലാ സംസ്ഥാനങ്ങള്‍ക്കും മാതൃകയാണ്. കേരളത്തിലെ ആരോഗ്യപരിരക്ഷ എല്ലാവരും പിന്തുടരണമെന്ന് വാര്‍ത്താ അവതാരകന്‍ പറയുന്നു.

മാര്‍ച്ച് 24 ന് 4516 സാമ്പിളുകള്‍ പരിശോധനയ്ക്ക് അയച്ചതില്‍ 3331 ഫലങ്ങള്‍ നെഗറ്റീവ് ആണെന്ന് കണ്ടെത്തി. രാജ്യത്ത് ഏറ്റവും കൂടുതല്‍ കൊവിഡ് ടെസ്റ്റുകള്‍ നടത്തിയ സംസ്ഥാനം, എല്ലാ ജില്ലകളിലും ആശുപത്രികള്‍, പുതിയ ഐസോലേഷന്‍ വാര്‍ഡുകള്‍, കൂടുതല്‍ ഫലപ്രദമാക്കാന്‍ 276 അധിക ഡോക്ടര്‍മാരെ എന്നിവരെ നിയമിച്ചതായി സംവാദ പരിപാടിയില്‍ പറയുന്നു.