'മാനസികനില തെറ്റിയത് പിണറായിയ്ക്ക്': ചതിയും അക്രമവും നടത്താൻ ഞങ്ങളും തയ്യാറെന്ന് കെ സുരേന്ദ്രൻ

തിരുവനന്തപുരം: മുഖ്യമന്ത്രി പിണറായി വിജയൻ്റെ വാര്‍ത്താ സമ്മേളനത്തിലെ പരാമര്‍ശങ്ങള്‍ക്ക് മറുപടിയുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ. ബിജെപി അധ്യക്ഷനെ വേറെ കണ്ടോളാം എന്നു പറയുന്ന പിണറായിയുടെ ഉദ്ദേശ്യം വ്യക്തമാണെന്നും പാര്‍ട്ടി ക്രിമിനലുകള്‍ക്കും സിപിഎമ്മിൻ്റെ പോലീസിനും അക്രമം നടത്താനുള്ള സന്ദേശമാണ് മുഖ്യമന്ത്രി നൽകുന്നതെന്നും കെ സുരേന്ദ്രൻ പറഞ്ഞു. മുഖ്യമന്ത്രിയും ഉന്നത വിദ്യാഭ്യാസമന്ത്രി കെ ടി ജലീലും രാജ വെക്കണമെന്ന് ആവശ്യപ്പെട്ട് ബിജെപി നടത്തിയ സെക്രട്ടറിയേറ്റ് മാര്‍ച്ച് ഉത്ഘാടനം ചെയ്യുമ്പോഴായിരുന്നു കെ സുരേന്ദ്രൻ്റെ പ്രതികരണം.

'ചതിയും അക്രമവും നടത്തി' സമരത്തെ നേരിടാനാണ് ഭാവമെങ്കിൽ 'ഞങ്ങളും തയ്യാറാണെന്ന്' കെ സുരേന്ദ്രൻ പറഞ്ഞു. അഴിമതിയുമായി ബന്ധപ്പെട്ടുള്ള രാഷ്ട്രീയാരോപണങ്ങളാണ് ഉന്നയിച്ചതെന്നും അതിനൊന്നും മറുപടി നല്‍കാൻ മുഖ്യമന്ത്രി തയ്യാറായിട്ടില്ലെന്നും കെ സുരേന്ദ്രൻ പറഞ്ഞു. "മാനസിക നില തെറ്റിയത് പിണറായിയ്ക്കാണ്. ഭയമാണ് അദ്ദേഹത്തെ വേട്ടയാടുന്നത്. സ്വന്തം നിഴലിനെപ്പോലും അദ്ദേഹം ഭയപ്പെടുന്നു." അന്വേഷണ ഏജൻസികള്‍ തന്നിലേയ്ക്ക് എത്തുമെന്ന ആശങ്കയിലാണ് മുഖ്യമന്ത്രിയെന്നും കെ സുരേന്ദ്രൻ ആരോപിച്ചു.

Also Read: ആറു മാസമായി ചൈനീസ് അതിർത്തി വഴി നുഴഞ്ഞുകയറ്റമില്ലെന്ന് കേന്ദ്ര ആഭ്യന്തര മന്ത്രാലയം

"കെ സുരേന്ദ്രൻ ഒരു പ്രത്യേക മാനസികാവസ്ഥയ്ക്ക് ഉടമയാണ്" എന്നായിരുന്നു മുഖ്യമന്ത്രി പിണറായി വിജയൻ ചൊവ്വാഴ്ച വാര്‍ത്താ സമ്മേളനത്തിൽ പ്രതികരിച്ചത്. "എന്തും വിളിച്ചു പറയുമെന്ന നിലയിലാണ് അദ്ദേഹം." ഇത്തരത്തിലുള്ള മാനസികനിലയുള്ളയാളെ പാര്‍ട്ടി അധ്യക്ഷസ്ഥാനത്ത് ഇരുത്തിയതിന് ബിജെപിയാണ് മറുപടി നല്‍കേണ്ടതെന്നും മുഖ്യമന്ത്രി പറഞ്ഞു. അഴിമതി വിരുദ്ധ നിലപാട് എക്കാലത്തും "ഞങ്ങള്‍ക്ക്" ഉള്ളതെന്നും മുഖ്യമന്ത്രി വ്യക്തമാക്കി. ബിജെപി അധ്യക്ഷൻ കെ സുരേന്ദ്രനെ പേരെടുത്തു പറഞ്ഞുള്ള പ്രതികരണത്തിനായിരുന്നു കെ സുരേന്ദ്രൻ്റെ മറുപടി.

Also Read: ബാബറി മസ്ജിദ് തകർത്ത കേസിൽ സെപ്റ്റംബർ 30ന് വിധി; ബിജെപി നേതാക്കൾ ഹാജരാകണം

പിണറായിയുടെ ഭീഷണി ബിജെപിയ്ക്ക് നേരെ വേണ്ടെന്നും ഭീഷണി കൊണ്ട് പിന്മാറുന്നവരല്ല ബിജെപിയെന്ന് പിണറായിയ്ക്ക് വ്യക്തമായി അറിയാമെന്നും കെ സുരേന്ദ്രൻ മറുപടി നൽകി. മുഖ്യമന്ത്രി 'മറ്റു തരത്തിൽ മറുപടി നല്‍കുമെന്നാണ്' പറഞ്ഞതെന്നും അത് കാത്തിരിക്കുകയാണെന്നും സുരേന്ദ്രൻ പറഞ്ഞു. പിണറായി തന്‍റെ ചരിത്രം വിശദീകരിച്ചത് പരിഹാസ്യമായെന്നും ബെര്‍ലിൻ കുഞ്ഞനന്തൻ നായരുടെ പുസ്തകം വായിച്ചിട്ടുള്ളവര്‍ക്ക് പിണറായി ആരെന്ന് വ്യക്തമാകുമെന്നും കെ സുരേന്ദ്രൻ പറഞ്ഞു.