ശബരിമല വിമാനത്താവളം: കേന്ദ്രാനുമതിയ്ക്ക് അഭ്യര്‍ത്ഥിച്ച് മുഖ്യമന്ത്രി

കണ്ണൂ‍ര്‍: ശബരിമല വിമാനത്താവളത്തിന് കേന്ദ്രാനുമതി ലഭ്യമാക്കണമെന്ന അഭ്യര്‍ത്ഥനയുമായി മുഖ്യമന്ത്രി പിണറായി വിജയൻ. കണ്ണൂര്‍ വിമാനത്താവളത്തിന്‍റെ ഉദ്ഘാടനവേദിയിൽ കേന്ദ്ര വ്യോമയാനമന്ത്രി സുരേഷ് പ്രഭുവിനോടായിരുന്നു മുഖ്യമന്ത്രിയുടെ അഭ്യര്‍ത്ഥന.

കണ്ണൂര്‍ വിമാനത്താവളത്തിനായി മുൻകൈയെടുത്ത സംസ്ഥാന സര്‍ക്കാര്‍ നടപടിയെ കേന്ദ്രമന്ത്രി പ്രശംസിച്ചിരുന്നു. രാജ്യത്ത് ഏറ്റവുമധികം അന്താരാഷ്ട്ര വിമാനത്താവളങ്ങളുള്ള സംസ്ഥാനം കേരളമാണെന്നും പുതിയ വിമാനത്താവളങ്ങള്‍ സ്ഥാപിക്കാൻ സംസ്ഥാനസര്‍ക്കാര്‍ മുൻകൈയെടുക്കുന്ന നിലപാട് സ്വാഗതാര്‍ഹമാണെന്നുമായിരുന്നു കേന്ദ്രവ്യോമയാനമന്ത്രിയുടെ വാക്കുകള്‍.

എരുമേലിയ്ക്ക് സമീപമുള്ള ചെറുവള്ളി എസ്റ്റേറ്റ് പ്രദേശത്ത് വിമാനത്താവളം സ്ഥാപിക്കാനാണ് സംസ്ഥാന സര്‍ക്കാര്‍ പദ്ധതിയിടുന്നത്. ശബരിമല വിമാനത്താവളം സ്ഥാപിക്കാനായി ചെറുവള്ളി എസ്റ്റേറ്റ് തെരഞ്ഞെടുത്തതായി സംസ്ഥാന സര്‍ക്കാര്‍ നിയമസഭയെ അറിയിച്ചിരുന്നു. വിമാനത്താവളത്തിന്‍റെ സാധ്യതാപഠനവും പരിസ്ഥിതി ആഘാതപഠനവും മാര്‍ച്ച് 31നകം പൂര്‍ത്തിയാക്കും.

ആറന്മുള വിമാനത്താവള പദ്ധതി ഉപേക്ഷിച്ച സാഹചര്യത്തിൽ പാടം നികത്തുകയോ കുന്നിടിക്കുകയോ ചെയ്യാതെ വിമാനത്താവളം ഉണ്ടാക്കാൻ അനുയോജ്യമായ സ്ഥലമായി സര്‍ക്കാര്‍ ചെറുവള്ളി എസ്റ്റേറ്റ് തെരഞ്ഞെടുക്കുകയായിരുന്നു.