കേരളാ കോൺഗ്രസ് തർക്കം; സമവായത്തിന് നാളെ ചർച്ച

കോട്ടയം: കേരളാ കോൺഗ്രസിലെ തർക്കം തീർക്കാൻ നാളെ യുഡിഎഫ് നേതാക്കളുടെ നേതൃത്വത്തിൽ ജോസ് കെ മാണിയുമായി ചർച്ചനടത്തും. പാലാ ഉപതെരഞ്ഞെടുപ്പ് കഴിയുംവരെയെങ്കിലും തർക്കം ഒഴിവാക്കാനാണ് യുഡിഎഫ് ശ്രമിക്കുന്നത്. ചെയർമാൻ സ്ഥാനത്തിൽ വിട്ടുവീഴ്ച ചെയ്യില്ലെന്നാണ് ഇരുവിഭാഗങ്ങളും നിലപാടെടുത്തിരിക്കുന്നത്.

തന്നെ ചെയർമാനായി തെരഞ്ഞെടുത്തതിലെ സ്റ്റേ നീക്കാൻ നാളെ ജോസ് കെ മാണി തൊടുപുഴ കോടതിയെ സമീപിക്കും. ജോസ് കെ മാണിയുമായി തിരുവനന്തപുരത്താണ് ചർച്ച. പാലാ ഉപതെരഞ്ഞെടുപ്പിൽ ഏത് ചിഹ്നത്തിൽ മത്സരിക്കുമെന്നുപോലും നിലവിൽ തർക്കമുണ്ട്. രണ്ടില നൽകില്ലെന്നാണ് ജോസഫിന്റെ നിലപാട്.

അതേസമയം, രണ്ടില ചിഹ്നം നൽകുന്നത് ഒരു വ്യക്തിയല്ലല്ലോ, തെരഞ്ഞെടുപ്പ് കമ്മീഷനല്ലേ, അത് തെരഞ്ഞെടുപ്പ് കമ്മീഷൻ തീരുമാനിക്കട്ടെ എന്ന് ജോസ് കെ മാണി പറഞ്ഞു. സമവായത്തിന് കേരളാ കോൺഗ്രസ് ഒരിക്കലും എതിരല്ല. ഒന്നിച്ചുനിൽക്കണമെന്നുതന്നെയാണ് തങ്ങളുടെ നിലപാടെന്നും ജോസ് കെ മാണി പറഞ്ഞു.

ജോസ് കെ മാണി വിഭാഗം കോട്ടയത്ത് സ്റ്റിയറിങ് കമ്മറ്റി യോഗം ചേർന്നിരുന്നു. കേരളാ കോൺഗ്രസിലെ പോഷക സംഘടനകൾ ഓരോന്നായി പിളരുന്ന അവസ്ഥയും നിലവിലുണ്ട്. കേരളാ കോൺഗ്രസ് വനിതാ വിഭാഗം ഞായറാഴ്ച പിളർന്നിരുന്നു.