പ്രചരിച്ചത്
നിയമസഭാ തെരഞ്ഞെടുപ്പിൽ കേരളാ കോൺഗ്രസ് മത്സരിച്ച സീറ്റുകളിൽ സിപിഐ നിസഹകരണം നടത്തിയെന്നാണ് മാധ്യമങ്ങൾ റിപ്പോർട്ട് ചെയ്തത്. പാർട്ടിയുടെ സ്റ്റിയറിങ് കമ്മിറ്റി യോഗത്തിൽ വിമർശനം ഉയർന്നുവെന്നായിരുന്നു ആരോപണം. യോഗത്തിൽ ഇക്കാര്യം ജോസ് കെ മാണിയെ അറിയിച്ചുവെന്നും ഏഷ്യാനെറ്റ് ന്യൂസ് റിപ്പോർട്ട് ചെയ്തിരുന്നു. വാശിയേറിയ പോരാട്ടം നടന്ന കോട്ടയം ജില്ലയിലെ മണ്ഡലങ്ങളിലടക്കം സിപിഐയിൽ നിന്നും നിസഹകരണം ഉണ്ടായെന്നായിരുന്നു റിപ്പോർട്ടിൽ പറഞ്ഞത്. ഏറ്റവും വാശിയേറിയ മത്സരം നടക്കുന്ന മണ്ഡലങ്ങളിൽ ഒന്നായ പാലാ, റാന്നി, ഇരിക്കൂർ, കാഞ്ഞിരപ്പള്ളി എന്നിവടങ്ങളിൽ സിപിഐ നേതൃത്വം നിശബ്‌ദമായിരുന്നു എന്നായിരുന്നു പ്രചരിച്ച റിപ്പോർട്ട്.
ജോസ് കെ മാണി പറഞ്ഞത് ഇങ്ങനെ
"കേരളാ കോണ്‍ഗ്രസ്സ് എം സ്റ്റിയറിംഗ് കമ്മറ്റി യോഗത്തില്‍ സിപിഐക്കെതിരായി വിമര്‍ശനം എന്ന പേരില്‍ ചില മാധ്യമങ്ങളിലും സോഷ്യൽമീഡിയായിലും വാർത്തപ്രചരിക്കുന്നത് ശ്രദ്ധയിൽപെട്ടിട്ടുണ്ട്. അടിസ്ഥാനരഹിതമായ ഇത്തരം വാർത്തകളിൽ യാതൊരു വിശ്വാസതയും ഇല്ലാത്തതാണ്. ഇടതുമുന്നണിയിലെ ഘടകകക്ഷികള്‍ക്കിടയില്‍ ഭിന്നത ഉണ്ടെന്ന് വരുത്തിത്തീര്‍ക്കാനുള്ള ബോധപൂര്‍വ്വമായ ചിലരുടെ ശ്രമമാണ് ഈ വാര്‍ത്തയ്ക്ക് പിന്നില്‍. ഇടതുപക്ഷ ജനാധിപത്യ മുന്നണിയിലെ ഘടകകക്ഷികളെല്ലാം ഒറ്റക്കെട്ടായി തെരെഞ്ഞെടുപ്പ് രംഗത്ത് പ്രവര്‍ത്തിച്ചു എന്ന വിലയിരുത്തലാണ് പാർട്ടി സ്റ്റിയറിംഗ് കമ്മറ്റി യോഗം ഈ കഴിഞ്ഞ ദിവസം നടത്തിയത്. കേരളാ കോണ്‍ഗ്രസ്സ് എം മത്സരിച്ച എല്ലാ സീറ്റുകളിലും സിപിഐ ഉള്‍പ്പടെയുള്ള എല്ലാ ഘടകകക്ഷികളുടെ പ്രവര്‍ത്തനങ്ങളിൽ പൂര്‍ണ്ണ തൃപ്തിയുണ്ടെന്നാണ് സ്റ്റിയറിംഗ് കമ്മറ്റി വിലയിരുത്തിയത്. ഇതിന് വിപരീതമായ കാര്യങ്ങളാണ് ചില മാധ്യമങ്ങള്‍ റിപ്പോര്‍ട്ട് ചെയ്തിട്ടുള്ളത്." ജോസ് കെ മാണി ഫേസ്ബുക്ക് പോസ്റ്റിൽ പറഞ്ഞു.