രാജ്യസഭാ സീറ്റ് കേരള കോൺഗ്രസിന് വിട്ടുനൽകിയേക്കും

ന്യൂ‍ഡൽഹി: രാജ്യസഭാ സീറ്റ് കേരള കോൺഗ്രസ് എമ്മിന് തന്നെ വിട്ടു നൽകാൻ കോൺഗ്രസ് സംസ്ഥാന നേതൃത്വം ആവശ്യപ്പെടുമെന്ന് സൂചന. ഇക്കാര്യത്തിൽ സംസ്ഥാനനേതൃത്വം ഒറ്റത്തവണ ഇളവ് നൽകണമെന്ന് ഹൈക്കമാൻഡിനോട് ആവശ്യപ്പെടുമെന്നാണ് റിപ്പോര്‍ട്ടുകള്‍. പി കെ കുഞ്ഞാലിക്കുട്ടിയും ജോസ് കെ മാണിയും ഇന്ന് കോൺഗ്രസ് അധ്യക്ഷൻ രാഹുൽ ഗാന്ധിയുമായി ചര്‍ച്ച നടത്താനിരിക്കേയാണ് പുതിയ റിപ്പോര്‍ട്ടുകള്‍ പുറത്തുവരുന്നത്.

യുഡിഎഫിന്‍റെ വിശാലതാത്പര്യം പരിഗണിച്ച് ഇത്തവണ കേരള കോൺഗ്രസിന് തന്നെ വിട്ടുനൽകണമെന്നായിരിക്കും സംസ്ഥാന നേതാക്കൾ രാഹുൽ ഗാന്ധിയോട് ആവശ്യപ്പെടുക. സംസ്ഥാനനേതൃത്വം ഒറ്റക്കെട്ടായി ആവശ്യപ്പെടുന്ന സാഹചര്യത്തിൽ കേന്ദ്ര നേതൃത്വം ഇതിനെ എതിര്‍ക്കാനിടയില്ല.

രാജ്യസഭാസീറ്റിന്‍റെ കാര്യത്തിൽ കോൺഗ്രസ് വിട്ടുവീഴ്ച ചെയ്യണമെന്ന നിലപാടിൽ മുസ്ലിം ലീഗ് ഉറച്ചുനിന്ന സാഹചര്യത്തിലാണ് കോൺഗ്രസ് സംസ്ഥാനനേതൃത്വത്തിന് തീരുമാനം മാറ്റേണ്ടി വരുന്നത്. ഇതുസംബന്ധിച്ച് പി കെ കുഞ്ഞാലിക്കുട്ടി മുതിര്‍ന്ന കോൺഗ്രസ് നേതാവ് ഗുലാം നബി ആസാദുമായി കൂടിക്കാഴ്ച നടത്തിയിരുന്നു.

പാര്‍ട്ടിയ്ക്കുള്ളിൽ നിന്ന് എതിര്‍പ്പുയര്‍ന്ന സാഹചര്യത്തിൽ തന്നെ സീറ്റിലേയ്ക്ക് പരിഗണിച്ചില്ലെങ്കിലും കേരള കോൺഗ്രസിന് രാജ്യസഭാ സീറ്റ് വിട്ടുനൽകരുതെന്ന് രാജ്യസഭാ ഉപാധ്യക്ഷൻ പി ജെ കുര്യൻ രാഹുൽ ഗാന്ധിയ്ക്ക് കത്തെഴുതിയിരുന്നു. സീറ്റ് വീട്ടുനൽകേണ്ടതില്ലെന്നായിരുന്നു കോൺഗ്രസ് സംസ്ഥാന നേതൃത്വത്തിന്‍റെയും നിലപാട്.