38 പേര്ക്ക് സമ്പര്ക്കത്തിലൂടെ കൊവിഡ്
കേരളത്തില് ഇന്ന് മൂന്നാം ദിനവും 200 കടന്ന് കൊവിഡ് കേസുകള്. ഇന്ന് 38 പേര്ക്ക് സമ്പര്ക്കത്തിലൂടെ രോഗം ബാധിച്ചു. തിരുവനന്തപുരം ജില്ലയിലെ 22 പേര്ക്കും കോഴിക്കോട് ജില്ലയിലെ 5 പേര്ക്കും കാസര്ഗോഡ് ജില്ലയിലെ 4 പേര്ക്കും എറണാകുളം ജില്ലയിലെ 3 പേര്ക്കും മലപ്പുറം ജില്ലയിലെ 2 പേര്ക്കും കൊല്ലം, ആലപ്പുഴ ജില്ലകളിലെ ഒരാള്ക്ക് വീതമാണ് സമ്പര്ക്കത്തിലൂടെ രോഗം ബാധിച്ചത്. ഇതുകൂടാതെ കണ്ണൂര് ജില്ലയിലെ 7 ഡിഎസ്സി ജവാന്മാര്ക്കും 2 സിഐഎസ്എഫ് ജവാന്മാര്ക്കും തൃശൂര് ജില്ലയിലെ 2 ബിഎസ്എഫ്കാര്ക്കും 2 ഷിപ്പ് ക്രൂവിനും രോഗം ബാധിച്ചിട്ടുണ്ട്.
സംസ്ഥാനത്ത് വീണ്ടും കൊവിഡ് മരണം; മരിച്ചത് മലപ്പുറം സ്വദേശി
കേരളത്തിൽ മലപ്പുറം മഞ്ചേരി മെഡിക്കൽ കോളേജിൽ നിരീക്ഷണത്തിലിരിക്കെ മരിച്ചയാൾക്കാണ് കൊവിഡ് രോഗബാധ സ്ഥിരീകരിച്ചു. മലപ്പുറം വണ്ടൂർ ചോക്കാട് സ്വദേശി മുഹമ്മദാണ് മരിച്ചത്. 82 വയസ്സുണ്ടായിരുന്നു. ഇന്നലെയാണ് അദ്ദേഹം മരിച്ചത്. മരണത്തിന് ശേഷം മൃതദേഹം മെഡിക്കൽ കോളേജ് ആശുപത്രിയിൽ തന്നെ സൂക്ഷിച്ചിരിക്കുകയായിരുന്നു. സംസ്ഥാനത്ത് മരിച്ചവരുടെ എണ്ണം 25 ആയി ഉയർന്നു. അർബുദ രോഗത്തെ തുടർന്ന് ചികിത്സയിലായിരുന്നു ഇദ്ദേഹം. ജൂൺ 29നാണ് ഇദ്ദേഹം റിയാദിൽ നിന്നും തിരികെ എത്തിയത്. കടുത്ത പനിയെ തുടർന്ന് ഈ മാസം ഒന്നാം തിയ്യതിയാണ് മഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചത്.
ഇന്നലെ 240 പേര്ക്ക് കൊവിഡ്
സംസ്ഥാനത്ത് ശനിയാഴ്ച ഏറ്റവും ഉയര്ന്ന കൊവിഡ് കേസ് രേഖപ്പെടുത്തി. 240 പേർക്കാണ് ഇന്നലെ കൊവിഡ് സ്ഥിരീകരിച്ചത്. മലപ്പുറം ജില്ലയില് നിന്നുള്ള 37 പേര്ക്കും കണ്ണൂര് ജില്ലയില് നിന്നുള്ള 35 പേര്ക്കും പാലക്കാട് ജില്ലയില് നിന്നുള്ള 29 പേര്ക്കും പത്തനംതിട്ട ജില്ലയില് നിന്നുള്ള 22 പേര്ക്കും ആലപ്പുഴ തൃശൂര് ജില്ലകളില് നിന്നുള്ള 20 പേര്ക്ക് വീതവും തിരുവനന്തപുരം കൊല്ലം ജില്ലകളില് നിന്നുള്ള 16 പേര്ക്ക് വീതവും കാസര്ഗോഡ് ജില്ലയില് നിന്നുള്ള 14 പേര്ക്കും എറണാകുളം ജില്ലയില് നിന്നുള്ള 13 പേര്ക്കും കോഴിക്കോട് ജില്ലയില് നിന്നുള്ള 8 പേര്ക്കും കോട്ടയം ജില്ലയില് നിന്നുള്ള 6 പേര്ക്കും ഇടുക്കി വയനാട് ജില്ലകളില് നിന്നുള്ള 2 പേര്ക്കുമാണ് ഇന്നലെ രോഗം സ്ഥിരീകരിച്ചത്.
രാജ്യത്ത് ഒറ്റ ദിവസം രോഗം 24,850 പേർക്ക്
രാജ്യത്ത് കൊവിഡ് രോഗബാധയിൽ റെക്കോഡ് വര്ധന. 24 മണിക്കൂറിനിടെ ഇന്ത്യയിൽ 24850 പേര്ക്ക് കൊവിഡ് ബാധിച്ചതായി കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. 24 മണിക്കൂറിനുള്ളിൽ 613 പേരാണ് രാജ്യത്ത് കൊവിഡ് ബാധിച്ചു മരിച്ചതെന്ന് മന്ത്രാലയത്തെ ഉദ്ധറിച്ച് വാര്ത്താ ഏജൻസി റിപ്പോര്ട്ട് ചെയ്തു. രാജ്യത്തെ മൊത്തം പോസിറ്റീവ് കേസുകള് 6,73,165 ആയി വര്ധിച്ചെന്നാണ് കണക്കുകള്. ഇതിൽ 2,44,814 പേരാണ് നിലവിൽ ചികിത്സയിലുള്ളത്. 4,09,083 പേര് ഇതുവരെ രോഗമുക്തി നേടി ആശുപത്രി വിട്ടു. ഏറ്റവു പുതിയ കണക്കുകള് പ്രകാരം രാജ്യത്തെ കൊവിഡ് മരണം 19,268 ആയി.
ലോകത്താകമാനം കൊവിഡ് രോഗികള് 1.13 കോടി
ആഗോളതലത്തില് കൊവിഡ് ബാധിതരുടെ എണ്ണം ഒരു കോടി പതിമൂന്നരലക്ഷം പിന്നിട്ടു. 24 മണിക്കൂറിനിടെ 1.83 ലക്ഷം പേര്ക്കാണ് പുതുതായി കൊവിഡ് സ്ഥിരീകരിച്ചത്. അമേരിക്കയില് 40,000 ത്തോളം പേര്ക്കും ബ്രസീലില് മുപ്പതിനായിരത്തോളം പേര്ക്കും ആണ് 24 മണിക്കൂറിനിടെ കൊവിഡ് ബാധിച്ചത്. മരണസംഖ്യ 5.5 ലക്ഷം കടന്നു. അമേരിക്കയില് 1.32 ലക്ഷം പേരും ബ്രസീലില് 64,000 പേരും ഇതുവരെ മരിച്ചത്.