തമിഴ്‌നാടിന് കുടിവെള്ളം നൽകാൻ തയ്യാറെന്ന് അറിയിച്ച് കേരളം

തിരുവനന്തപുരം: മഴയുടെ ദൗർലഭ്യം മൂലം കുടിവെള്ള ക്ഷാമം അനുഭവയ്ക്കുന്ന തമിഴ്‌നാടിന്‌ സഹായം നൽകാൻ ഒരുക്കമാണെന്ന് അറിയിച്ച് കേരളം. മുഖ്യമന്ത്രി പിണറായി വിജയൻ നേരിട്ടാണ് ഇക്കാര്യം തമിഴ്‌നാട് മുഖ്യമന്ത്രി എടപ്പാടി പളനിസ്വാമിയെ അറിയിച്ചത്.

20ലക്ഷം ലിറ്റർ കുടിവെള്ളം ട്രെയിനിൽ തമിഴ്‌നാട്ടിൽ എത്തിച്ചു തരാമെന്നാണ് പിണറായി വിജയൻ അറിയിച്ചത്. എന്നാൽ, ആവശ്യമില്ലെന്ന് തമിഴ്‌നാട് മുഖ്യമന്ത്രി മറുപടി നൽകി. ജലാശയങ്ങൾ വറ്റി വരളുകയും കാർഷികമേഖലയെ വരൾച്ച കാര്യമായി ബാധിക്കുകയും ചെയ്ത സാഹചര്യത്തിലാണ് കേരള സർക്കാർ സഹായം വാഗ്‌ദാനം ചെയ്തതെന്ന് പിണറായി വിജയൻ ഫേസ്‌ബുക്കിൽ കുറിച്ചു.

ഫേസ്‌ബുക്ക് പോസ്റ്റിന്റെ പൂർണരൂപം വായിക്കാം: രൂക്ഷമായ കുടിവെള്ളക്ഷാമം അനുഭവിക്കുന്ന തമിഴ്നാടിന് കുടിവെള്ളം ട്രെയിന്‍മാര്‍ഗം എത്തിച്ചുനല്‍കാന്‍ സംസ്ഥാന സര്‍ക്കാര്‍ സന്നദ്ധതയറിയിച്ചു.

തമിഴ്നാട് മുഖ്യമന്ത്രിയുടെ ഓഫീസുമായി ഇക്കാര്യം അറിയിച്ച് നമ്മുടെ ഓഫീസ് ബന്ധപ്പെട്ടെങ്കിലും ഇപ്പോള്‍ ആവശ്യമില്ലെന്ന മറുപടിയാണ് ലഭിച്ചത്. തിരുവനന്തപുരത്തുനിന്ന് ചെന്നൈയിലേക്ക് ട്രെയിന്‍മാര്‍ഗം 20 ലക്ഷം ലിറ്റര്‍ കുടിവെള്ളം എത്തിക്കാനായിരുന്നു സര്‍ക്കാര്‍ ശ്രമിച്ചത്. ചെന്നൈയിലെ പ്രധാന ജലാശയങ്ങളൊക്കെ വറ്റിവരണ്ടിരിക്കുകയാണ്. കാര്‍ഷികമേഖലയെ വരള്‍ച്ച കാര്യമായി ബാധിച്ചിട്ടുണ്ട്. ഈ സാഹചര്യത്തിലായിരുന്നു കേരള സര്‍ക്കാരിന്‍റെ സഹായ വാഗ്ദാനം.