ഒരു കൊല്ലത്തേയ്ക്ക് മലയാളികള് മാസ്ക് ധരിക്കണം
പുതിയ കൊവിഡ് മാനദണ്ഡങ്ങള് പ്രകാരം, അടുത്ത ഒരു കൊല്ലം വരെ കേരളത്തില് ജനങ്ങള് മാസ്കുകള് ധരിക്കുകയും സാമൂഹിക അകലം പാലിക്കുകയും കൂട്ടംകൂടി നില്ക്കല് ഒഴിവാക്കുകയും ചെയ്യണം. ചട്ടങ്ങള് കൃത്യമായി പാലിക്കുന്നുണ്ടെന്ന് ഉറപ്പ് വരുത്താന് ജില്ലാ കളക്ടര്മാര്ക്ക് നിര്ദ്ദേശം നല്കി. ആരെങ്കിലും നിയന്ത്രണങ്ങള് ലംഘിച്ചാല് കേരള പകര്ച്ചവ്യാധി ഓര്ഡിനന്സ് 2020 പ്രകാരം ശിക്ഷിക്കപ്പെടുമെന്ന് സംസ്ഥാന സര്ക്കാര് അറിയിച്ചു.
മാസ്കുകളോ മുഖാവരണമോ ധരിക്കുക
എല്ലാ ആളുകളും മൂക്കും വായയും മാസ്കോ മുഖാവരണമോ ഉപയോഗിച്ച് മൂടണം. പ്രത്യേകിച്ച് പൊതു ഇടങ്ങളില്, ജോലി സ്ഥലങ്ങളില്, ആളുകള് കൂടുന്നിടത്ത്, പൊതുഗതാഗതം എന്നിവിടങ്ങളില് മാസ്ക് ധരിക്കേണ്ടത് നിര്ബന്ധമാണ്.
സാമൂഹിക അകലം
എല്ലാ ജനങ്ങളും സാമൂഹിക അകലം പാലിക്കേണ്ടതാണ്. ഒരാളില് നിന്ന് മറ്റൊരാളിലേയ്ക്ക് ആറടി അകലമെങ്കിലും പാലിക്കണം. പ്രത്യേകിച്ച്, പൊതുവിടങ്ങളിലും ചടങ്ങുകളില് പങ്കെടുക്കുമ്പോള് സാമൂഹിക അകലം പാലിക്കണം.
വിവാഹ ചടങ്ങുകള്
വിവാഹ ചടങ്ങുകളിലും മറ്റു ആഘോഷങ്ങളിലും 50 ആളുകളില് കൂടുതല് പങ്കെടുക്കാന് പാടില്ല. ഇത്തരം ചടങ്ങുകളില് പങ്കെടുക്കുന്നവര് സാനിറ്റൈസര്, മുഖാവരണം അല്ലെങ്കില് മാസ്കുകള്, ആറടി അകലെ സാമൂഹിക അകലം എന്നിവ പാലിക്കേണ്ടതാണ്. പങ്കെടുക്കുന്ന എല്ലാവര്ക്കും ചടങ്ങിന്റെ മേല്നോട്ടക്കാര് സാനിറ്റൈസര് നല്കേണ്ടതാണ്.
സംസ്കാരം
സംസ്കാര ചടങ്ങുകളില് 20 ആളുകളില് കൂടുതല് പങ്കെടുക്കാന് പാടില്ല. ഈ ചടങ്ങുകളിലും മാസ്ക് ധരിക്കേണ്ടതാണ്. സാനിറ്റൈസര് ഉപയോഗിക്കുകയും സാമൂഹിക അകലം പാലിക്കേണ്ടതുമാണ്. കൊവിഡ് മരണങ്ങളില് പ്രോട്ടോക്കോള് പ്രകാരം ആയിരിക്കും സംസ്കാരം നടത്തുക.
സാമൂഹിക കൂട്ടായ്മ
ബന്ധപ്പെട്ട അധികാരികളുടെ സമ്മതപ്രകാരമല്ലാതെ സാമൂഹിക കൂട്ടായ്മകള്, ധര്ണ്ണ, പ്രകടനം, ഘോഷയാത്രകള്, സമ്മേളനം എന്നിവ നടത്താന് പാടില്ല. ഇത്തരം ഒത്തുചേരലുകളില് 10 ല് കൂടുതല് ആളുകള് പാടില്ല. ഇവിടെയും മാസ്കും, സാമൂഹിക അകലവും സാനിറ്റൈസറും നിര്ബന്ധമാണ്.
കടകളും വാണിജ്യ സ്ഥാപനങ്ങളും
കടകളിലും വാണിജ്യ സ്ഥാപനങ്ങളിലും ഒരേ സമയം 20 ആളുകളില് കൂടാന് പാടില്ല. സാമൂഹിക അകലം പാലിക്കേണ്ടത് കടകളുടെ വലിപ്പം അനുസരിച്ചായിരിക്കും. കടയിലെ എല്ലാ ആളളുകളും മാസ്ക് ധരിക്കേണ്ടതാണ്. കടയുടമ സാനിറ്റൈസര് നല്കേണ്ടതാണ്.
കൊവിഡ്-19 ജാഗ്രത ഇ- പ്ലാറ്റ്ഫോമില് രജിസ്റ്റര് ചെയ്യണം
മറ്റു സംസ്ഥാനങ്ങള്, കേന്ദ്രഭരണ പ്രദേശങ്ങള്, വിദേശ രാജ്യങ്ങള് എന്നിവിടങ്ങളില് നിന്നും കേരളത്തിലേക്ക് എത്തുന്നവര് കൊവിഡ്-19 ജാഗ്രത ഇ- പ്ലാറ്റ്ഫോമില് രജിസ്റ്റര് ചെേയ്യണ്ടതാണ്. ആളുകളെ കണ്ടെത്തല്, ക്വാറന്റൈന്ഡ ഉറപ്പാക്കല്, കൊവിഡ് വ്യാപനം സാധ്യത കുറയ്ക്കുക എന്നിവയ്ക്കെല്ലാം വേണ്ടിയാണ് ജാഗ്രത പോര്ട്ടല്.
അന്തര്- സംസ്ഥാന റോഡ് ഗതാഗതം
കേരളത്തില് നിന്നും പുറത്തേയ്ക്കുമുള്ള സാധാരണ റോഡ് ഗതാഗതം താത്ക്കാലികമായി നിര്ത്തിവച്ചു. പൊതു- സ്വകാര്യ സേവനങ്ങള് താത്കാലികമായി നിര്ത്തി. ആരും പൊതുയിടങ്ങളില് തുപ്പരുതെന്നും കേരള പകര്ച്ചവ്യാധി ഓര്ഡിനന്സില് വ്യക്തമാക്കുന്നു.