പ്രളയം;വൈദ്യുതി വിതരണം പുനസ്ഥാപിക്കാന്‍ മിഷന്‍ റീകണക്ട്

തിരുവനന്തപുരം: പ്രളയക്കെടുതിയില്‍ മുടങ്ങിയ വൈദ്യുതി വിതരണം യുദ്ധകാലാടിസ്ഥാനത്തില്‍ പുനസ്ഥാപിക്കുമെന്ന് വൈദ്യുതി ബോര്‍ഡ് അറിയിച്ചു. ഇവയുടെ പ്രവര്‍ത്തനങ്ങള്‍ക്കായി മിഷന്‍ റീകണക്ട് എന്ന പേരില്‍ കര്‍മസമിതി രൂപീകരിച്ചു. വൈദ്യുതി നിലയങ്ങളില്‍ വെള്ളം കയറിയതോടെ 350 കോടി രൂപയുടെ നഷ്ടം ബോര്‍ഡിനുണ്ടായി. ഇതിനു പുറമേ ഏകദേശം 470 കോടി രൂപയുടെ വരുമാന നഷ്ടവുമുണ്ടായി.

ജീവനക്കാര്‍ അവധി ദിവസങ്ങള്‍ പൂര്‍ണമായും ഒഴിവാക്കി കണക്ഷനുകള്‍ പുനസ്ഥാപിക്കാനാണ് തീരുമാനം. കൂടാതെ സര്‍വ്വീസില്‍ നിന്ന് വിരമിച്ചവരുടെയും മറ്റ് ഇലക്ട്രിക്കല്‍ സെക്ഷനില്‍നിന്നുള്ള ജീവനക്കാരുടെയും കരാറുകാരുടെയും സേവനം ലഭ്യമാക്കും. തമിഴ്നാട്, കര്‍ണാടക തുടങ്ങിയ സംസ്ഥാനങ്ങളില്‍നിന്നു ജീവനക്കാരെയും ട്രാന്‍സ്ഫോര്‍മറും നല്‍കാമെന്ന് അറിയിച്ചിട്ടുണ്ട്.

കണക്ഷന്‍ പുനസ്ഥാപിക്കാന്‍ താമസം നേരിടുന്ന വീടുകളില്‍ താല്‍കാലിക സംവിധാനത്തിലൂടെ വൈദ്യുതി നല്‍കും. കേടായ തെരുവുവിളക്കുകളും സൗജന്യമായി സ്ഥാപിക്കും. ദുരിതാശ്വാസ ക്യാമ്പുകളില്‍ മൊബൈല്‍ ഫോണ്‍ ചാര്‍ജ് ചെയ്യാന്‍ സംവിധാനം ഏര്‍പ്പെടുത്തും. എല്ലാ ജില്ലയുടെയും പ്രവര്‍ത്തനങ്ങള്‍ അതാത് ചീഫ് എന്‍ജിനീയര്‍മാര്‍ നിരീക്ഷിക്കുമെന്ന് ബോര്‍ഡ് അറിയിച്ചു.