ആലുവ ദുരിതാശ്വാസ ക്യാമ്പില്‍ ആയിരങ്ങള്‍

കേരളത്തില്‍ കനത്ത മഴയിലും വെള്ളപ്പൊക്കത്തിലും ഒറ്റപ്പെട്ടയാളുകളെ രക്ഷിക്കുന്നത് തുടരുന്നു. കേന്ദ്രസേനയുള്‍പ്പെടെ വിവിധ ഏജന്‍സികള്‍ ദുരിതാശ്വാസ പ്രവര്‍ത്തനത്തില്‍ പങ്കെടുക്കുന്നുണ്ട്. വെള്ളിയാഴ്‍ച്ച കേരളത്തില്‍ പലയിടങ്ങളിലും മഴ കുറഞ്ഞു.

08.43 PM: ആയിരക്കണക്കിന് ആളുകള്‍ കഴിയുന്ന ആലുവ യു.സി കോളേജിലെ ദുരിതാശ്വാസ ക്യാംപില്‍ ഇന്നത്തേക്ക് ഉള്ള ഭക്ഷണവും കുടിവെള്ളവും ഏതാണ്ട് ലഭ്യമായിട്ടുണ്ട്. ഭക്ഷണവും കുടിവെള്ളവുമായി ഇനി ഏതാനും വാഹനങ്ങള്‍ കൂടി ഇങ്ങോട്ടേക്ക് വരുന്നുണ്ട്. അതുകൊണ്ട് ഇനി ആരും റെഡി-ടു-ഈറ്റ് ഭക്ഷണങ്ങള്‍ അധികം സ്വരൂപിക്കേണ്ട. നാളെ മുതല്‍ പാചകം ചെയ്യാനുള്ള അരി, പച്ചക്കറികള്‍, പലവൃജ്ഞനങ്ങള്‍ എന്നിവയാണ് ആവശ്യം

19.17 PM: പരിഭ്രമിക്കരുത്. പ്രളയം ഒഴിയുകയാണ്. നിങ്ങള്‍ക്ക് ആവശ്യമായ അടിയന്തര വിവരങ്ങള്‍ താഴെ നല്‍കിയിരിക്കുന്നു. വിവരങ്ങള്‍ക്കായി ബന്ധപ്പെടാം


05:26 PM: എറണാകുളം ജില്ലയിലെ ദുരിതാശ്വാസ ക്യാമ്പുകളില്‍ കുടിവെള്ളം ദൗര്‍ലഭ്യം നേരിടുന്നുണ്ട്. നഗരത്തിനുള്ളിലെ കടകളില്‍ നിന്ന് ഇതിനോടകം കുപ്പിവെള്ളം ആളുകള്‍ കൂടുതലായി വാങ്ങിയതുകൊണ്ട് സ്റ്റോക്ക് കുറവാണെന്ന് റിപ്പോര്‍ട്ടുകള്‍. ഒന്നിലധികം ദുരിതാശ്വാസ ക്യാമ്പുകളില്‍ ഉള്ളവര്‍ ആവശ്യപ്പെടുന്ന പ്രധാന ആവശ്യം കുടിവെള്ളം ആണ്.


ആലുവ യുസി കോളേജിലെ ദുരിതാശ്വാസ ക്യാമ്പില്‍ നിലവില്‍ 8000ത്തോളം പേരെങ്കിലും കഴിയുന്നുണ്ടെന്ന് ദുരിതാശ്വാസ പ്രവര്‍ത്തനത്തില്‍ പങ്കെടുക്കുന്ന വളണ്ടിയര്‍മാര്‍ സമയം മലയാളത്തോട് പറഞ്ഞു. ഇവിടുത്തെ സ്ഥിതി ആശങ്കയുണ്ടാക്കുന്നതാണെന്നാണ് ഇവര്‍ പറയുന്നത്. വളണ്ടിയര്‍മാരുടെ എണ്ണം കുറവാണ്. ഭക്ഷണം, കുടിവെള്ളം എന്നിവയാണ് ഇവരുടെ ഏറ്റവും പ്രധാനപ്പെട്ട ആവശ്യങ്ങള്‍. കൂടുതല്‍ ആളുകള്‍ സഹായത്തിന് മുന്നോട്ടു വരണമെന്നും ദുരിതാശ്വാസ പ്രവര്‍ത്തകര്‍ പറയുന്നു.

എറണാകുളം ജില്ലയിലെ നിലവിലെ സാഹചര്യങ്ങള്‍ എന്തൊക്കെയാണ്. ദുരിതാശ്വാസ പ്രവര്‍ത്തനത്തില്‍ എന്തെല്ലാം ശ്രദ്ധിക്കണം.


കൊച്ചി നഗരത്തില്‍ മഴ കുറഞ്ഞു. വെള്ളിയാഴ്‍ച്ച വെയില്‍ ഉദിക്കുകയും ചെയ്‍‍തു. കളമശ്ശേരി മുതല്‍ ആലുവവരെയുള്ള ഭാഗങ്ങളില്‍ വെള്ളക്കെട്ട് ഇറങ്ങിയിട്ടില്ല. സമയം മലയാളം പ്രതിനിധികളില്‍ പ്രാദേശിക റെസ്‍ക്യൂ സംഘത്തെ ആലുവയില്‍ കണ്ടുമുട്ടിയിരുന്നു. കൊച്ചി നഗരത്തിന് പുറത്ത് ആലുവയിലേക്കുള്ള വഴിയിലെ ചിത്രങ്ങള്‍ (കൊച്ചി മെട്രോയില്‍ നിന്ന് പകര്‍ത്തിയത്)