പ്രളയക്കെടുതി: കൂടുതല്‍ കേന്ദ്ര സേനയെ ആവശ്യപ്പെടാൻ സർക്കാർ

തിരുവനന്തപുരം: സംസ്ഥാനത്തെ പ്രളയക്കെടുതി നേരിടാൻ കൂടുതൽ കേന്ദ്രസേനയെ ആവശ്യപ്പെടാൻ മുഖ്യമന്ത്രിയുടെ നേതൃത്വത്തിൽ ചേർന്ന ഉന്നതതലയോഗത്തിൽ തീരുമാനം. വ്യോമ,നാവിക,കര സേനകളുടെ കൂടുതൽ സഹായം തേടാനും കളക്ടര്‍മാരെ സഹായിക്കാന്‍ സ്‌പെഷ്യല്‍ ഓഫീസര്‍മാരെ നിയോഗിക്കാനും യോഗത്തിൽ തീരുമാനിച്ചു.

മുല്ലപ്പെരിയാർ അണക്കെട്ടിൽ നിന്ന് കൂടുതൽ വെള്ളം കൊണ്ട് പോവാൻ തമിഴ്നാടിനോട് ആവശ്യപ്പെടും. ഇതുമായി ബന്ധപ്പെട്ട് തമിഴ്നാട് മുഖ്യമന്ത്രിയോട് ഫോണിൽ സംസാരിക്കുമെന്ന് മുഖ്യമന്ത്രി പിണറായി വിജയൻ യോഗത്തിൽ വ്യക്തമാക്കി. ജലനിരപ്പ് 142 അടിയിലേക്കുയരുന്ന സാഹചര്യത്തിൽ കൂടുതൽ വെള്ളം കൊണ്ട് പോവണമെന്നാണ് കേരളത്തിൻെറ ആവശ്യം.

സംസ്ഥാനം ഇന്നേവരെ കാണാത്ത തരത്തിലുള്ള അടിയന്തര സാഹചര്യത്തിലൂടെ കടന്നുപോവുകയാണെന്ന് മുഖ്യമന്ത്രി പറഞ്ഞു. സാമ്പത്തിക സഹായം അടക്കമുള്ള കാര്യത്തിൽ എല്ലാവരുടെയും പിന്തുണ വേണമെന്നും മുഖ്യമന്ത്രി കൂട്ടിച്ചേർത്തു.