ഒരു മാസത്തെ ശമ്പളം ദുരിതാശ്വാസനിധിയിലേക്കെന്ന് ഉപരാഷ്ട്രപതി

ന്യുഡല്‍ഹി: കേരളത്തിലെ പ്രളയ ദുരിതം ഗുരുതരമെന്ന് ഉപരാഷ്ട്രപതി വെങ്കയ്യ നായിഡു. എംപിമാർ ഒരു മാസത്തെ ശമ്പളം കേരളത്തിനു സംഭാവന ചെയ്യണമെന്നും എംപിമാരുടെ ഫണ്ടിൽനിന്ന് ഒരു കോടി രൂപ വരെ സംഭാവന ചെയ്യാനാകുമെന്നും അദ്ദേഹം പറഞ്ഞു. തന്‍റെ ഒരു മാസത്തെ ശമ്പളം ദുരിതാശ്വാസ പ്രവര്‍ത്തനങ്ങള്‍ക്കായി നല്‍കുന്നുവെന്നും അദ്ദേഹം കൂട്ടിച്ചേര്‍ത്തു.

ചെങ്ങന്നൂരിലെ രക്ഷാപ്രവർത്തനം പൂർത്തിയാകുമ്പോഴും അഞ്ഞൂറിലേറെപ്പേർ വെള്ളക്കെട്ട് നിറഞ്ഞ വീടുകളിൽ തുടരുകയാണ്. ഒറ്റപ്പെട്ട പ്രദേശങ്ങളിൽ കഴിയുന്നവർക്കു ഭക്ഷണവും മരുന്നുകളുമെത്തിക്കുകയെന്നതാണു വെല്ലുവിളിയായി തുടരുന്നത്.

രക്ഷാപ്രവർത്തകർ എത്താത്ത വീടുകളിൽ ആരെങ്കിലും ഒറ്റപ്പെട്ടു കഴിയുന്നെങ്കിൽ മാത്രമാണ് അപകട സ്ഥിതി തുടരുന്നത്. ഇത്തരക്കാരെ കണ്ടെത്താനും മരുന്നും ഭക്ഷണവും നൽകാനുമായി സ്പീഡ് ബോട്ട്, ചെറിയ വള്ളം എന്നിവരുടെ ദൗത്യം തുടരുകയാണ്.