Kerala Govt All Party Meet: സർക്കാർ വിളിച്ച യോഗം ഇന്ന്

തിരുവനന്തപുരം: ശബരിമല വിഷയത്തിൽ സുപ്രീം കോടതി പുറപ്പെടുവിച്ച ഉത്തരവ് നടപ്പാക്കുന്നത് സംബന്ധിച്ചുള്ള തീരുമാനം കൈക്കൊള്ളാൻ സർക്കാർ വിളിച്ച സർവകക്ഷി യോഗം ഇന്ന്. നാളെ മണ്ഡല - മകരവിളക്ക് തീർത്ഥാടനം തുടങ്ങുന്നതിന് മുന്നോടിയായാണ് ചർച്ച. ഭരണഘടനാ ബെഞ്ച് പുറപ്പെടുവിച്ച ഉത്തരവ് പാലിക്കാൻ സർക്കാർ ബാധ്യസ്ഥമാണെന്ന് ചർച്ചയിൽ വ്യക്തമാക്കും.

സുപ്രീം കോടതി വിധി നടപ്പാക്കിയാൽ സർക്കാരിന് ശക്തമായ പ്രതിഷേധം നേരിടേണ്ടി വരുമെന്നാണ് സാഹചര്യങ്ങൾ സൂചിപ്പിക്കുന്നത്. പന്തളം രാജകുടുംബവും ബിജെപിയും കോൺഗ്രസും സർക്കാർ പിടിവാശി ഉപേക്ഷിക്കണമെന്നാണ് ആവശ്യപ്പെടുന്നത്. അതെ സമയം, ശബരിമല ദർശനത്തിന് പ്രത്യേക സുരക്ഷാ വേണമെന്ന തൃപ്തി ദേശായിയുടെ ആവശ്യം കേരള പോലീസ് തള്ളി.

സാധാരണ ഭക്തർക്ക് ലഭിക്കുന്ന സുരക്ഷ തൃപ്തിക്കും ലഭിക്കുമെന്ന് പോലീസ് വ്യക്തമാക്കി. എല്ലാ രാഷ്ട്രീയ പാർട്ടികളുടെയും പ്രതിനിധികൾ ഇന്ന് ചേരുന്ന യോഗത്തിൽ പങ്കെടുക്കുന്നുണ്ട്. പന്തളം രാജ കുടുംബവും തന്ത്രി കുടുംബവും ചർച്ചയിൽ പങ്കെടുക്കും. മുഖ്യമന്ത്രിയുടെ ചേമ്പറിൽ വെച്ചാണ് യോഗം ചേരുക.