പുനഃപരിശോധന ഹര്‍ജിയോട് സര്‍ക്കാരിന് എതിര്‍പ്പില്ലെന്ന് കടകംപള്ളി സുരേന്ദ്രന്‍

തിരുവനന്തപുരം: ശബരിമല സ്ത്രീ പ്രവേശന വിധിയില്‍ പുനഃപരിശോധനാ ഹര്‍ജി നല്‍കുന്നതിനെതിരെ സര്‍ക്കാരിന് എതിര്‍പ്പില്ലെന്ന് ദേവസ്വം മന്ത്രി കടകംപള്ളി സുരേന്ദ്രന്‍. ദേവസ്വം ബോര്‍ഡിന് സ്വന്തമായ തീരുമാനം എടുക്കാമെന്നും മന്ത്രി വ്യക്തമാക്കി.

ശബരിമലയുടെ കാര്യത്തില്‍ സര്‍ക്കാര്‍ നിലപാടില്‍ മാറ്റമില്ല. വിധിക്കെതിരെ ആര്‍ക്കുവേണമെങ്കിലും അപ്പീല്‍ പോകാം. സര്‍ക്കാരിന്‍റെ നയം ദേവസ്വം ബോര്‍ഡില്‍ അടിച്ചേല്‍പ്പിക്കില്ലെന്നും മന്ത്രി പറഞ്ഞു.

വിധിക്കെതിരെ പുനഃപരിശോധനാ ഹര്‍ജി നല്‍കുമെന്ന് പന്തളം രാജകുടുംബം വ്യക്തമാക്കിയിരുന്നു. ഇതേ ആവശ്യമാണ് പ്രതിപക്ഷ നേതാവ് രമേഷ് ചെന്നിത്തലയും ഉന്നയിച്ചിരുന്നു. ചൊവ്വാഴ്ച നടക്കുന്ന ദേവസ്വം ബോര്‍ഡ് യോഗത്തിനുശേഷമേ പുനപരിശോധനയെ കുറിച്ചുള്ള കാര്യങ്ങള്‍ തീരുമാനിക്കുകയുള്ളൂ എന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്‍റ് എ പത്മകുമാര്‍ വ്യക്തമാക്കിയിരുന്നു.