ലിഗയുടെ മൃതദേഹം സ്വദേശത്ത് സർക്കാർ എത്തിക്കും

തിരുവനന്തപുരം: കോവളത്ത് മരിച്ച വിദേശ യുവതി ലിഗയുടെ മൃതദേഹം സ്വദേശത്ത് എത്തിക്കാനുള്ള നടപടി സംസ്ഥാന സർക്കാർ ഏറ്റെടുക്കുമെന്ന് ടൂറിസം വകുപ്പ് മന്ത്രി കടകംപള്ളി സുരേന്ദ്രന്‍. ലിഗയുടെ കുടുംബത്തിന് അടിയന്തിര സഹായമായി അഞ്ച് ലക്ഷം രൂപയും നൽകും.

ലിഗയുടെ സഹോദരി ഇൽസിയെ സംസ്ഥാന ടൂറിസം ഡയറക്ടർ പി.ബാലകിരൺ സന്ദര്‍ശിച്ചു. മൃതദേഹം കൊണ്ടുപോകുന്നതിനുള്ള നിയമ തടസങ്ങൾ മാറ്റാൻ ടൂറിസം വകുപ്പ് മുൻകൈ എടുക്കുമെന്ന് ടൂറിസം ഡയറക്ടർ ഉറപ്പ് നല്‍കി.

മൃതദേഹം നാട്ടിൽ കൊണ്ട് പോകാനുള്ള ചിലവ്, ബന്ധുക്കളുടെ യാത്ര ചിലവ്, കേരളത്തിലെ താമസ ചിലവ് തുടങ്ങിയവ സംസ്ഥാന സർക്കാർ ഏറ്റെടുക്കും.