എൻഐഎയ്ക്ക് ആരേയും ചോദ്യം ചെയ്യാം; മന്ത്രിയെ വിളിപ്പിച്ചത് എന്തിനെന്ന് നമുക്കറിയില്ല: കേരള ഗവർണർ

തിരുവനന്തപുരം: മന്ത്രി കെടി ജലീലിനെ എൻഐഎ ചോദ്യം ചെയ്തതിൽ മാധ്യമങ്ങളോട് പ്രതികരിച്ച് ഗവര്‍ണര്‍ ആരിഫ് മുഹമ്മദ് ഖാന്‍ എന്‍ഐഎയ്ക്ക് ആരേയും ചോദ്യം ചെയ്യാന്‍ അധികാരമുണ്ടെന്നും എന്നാൽ ഇപ്പോൾ ഒന്നും പറയാൻ കഴിയില്ലെന്നും അദ്ദേഹം പറഞ്ഞു. അന്വേഷണ ഫലം വരെ എല്ലാവരും ക്ഷമ കാട്ടണമെന്ന് ഗവർണർ പറഞ്ഞതായി ഏഷ്യാനെറ്റ് ന്യൂസാണ് റിപ്പോർട്ട് ചെയ്തത്.

നിയമം എല്ലാവര്‍ക്കും മുകളിലാണെന്ന് ഗവര്‍ണര്‍ ചൂണ്ടിക്കാട്ടി. അന്വേഷണ ഏജന്‍സികളെ അവരുടെ ജോലി ചെയ്യാന്‍ അനുവദിക്കണമെന്നും ഗവർണർ പറഞ്ഞതായി മാതൃഭൂമി ഡോട്ട് കോമും റിപ്പോർട്ട് ചെയ്തു. എൻഐഎ നടപടി രാഷ്ട്രീയ പ്രേരിതമാണെന്ന ആരോപണത്തെക്കുറിച്ചുള്ള ചോദ്യത്തിനോട് ഇക്കാര്യത്തിൽ അഭിപ്രായം പറയുന്നത് തന്റെ പദവിക്ക് അനുയോജ്യമല്ലെന്നാണ് ആരിഫ് മുഹമ്മദ് ഖാന്‍ മറുപടി നൽകിയത്.

Also Read : സംസ്ഥാനത്ത് 13 പുതിയ ഹോട്ട്സ്പോട്ടുകൾ; ആകെ പ്രദേശങ്ങൾ 639

നാം നമ്മുടെ ജോലി ചെയ്യുകയാണ് വേണ്ടതെന്നും മറ്റുള്ളവരുടെ ജോലിയിൽ ഇടപെടാൻ പോകരുതെന്നും ഗവർണർ പറഞ്ഞു. 'നമ്മളില്‍ ഓരോരുത്തര്‍ക്കും ഓരോ ജോലിയുണ്ട്. നാം നമ്മുടെ ജോലി ചെയ്യുക. മറ്റുളളവരുടെ ജോലിയില്‍ ഇടപെടാന്‍ പോകരുത്. ദേശീയ അന്വേഷണ ഏജന്‍സിയാണ് അന്വേഷണം നടത്തുന്നത്. അവരെ നാം വിശ്വസിക്കണം. എന്‍ഐഎയ്ക്ക് ആരേയും ചോദ്യം ചെയ്യാന്‍ അധികാരമുണ്ട്. നിങ്ങള്‍ എത്ര വലിയവനായാലും നിയമത്തിന് കീഴ്‌പ്പെട്ടവനാണ്.' അദ്ദേഹം കൂട്ടിച്ചേർത്തു.

Also Read : കുടിയേറ്റ തൊഴിലാളികളെ പിടിച്ചത് 'വെറുതെയല്ല': രാജ്യവിരുദ്ധ പ്രവർത്തനത്തിന് തെളിവുണ്ടെന്ന് എൻഐഎ

മന്ത്രിയെ എന്തിനാണ് വിളിച്ചതെന്നോ എന്താണ് ചോദിച്ചതെന്നോ നമുക്കറിയില്ലെന്ന് പറഞ്ഞ അദ്ദേഹം അതുകൊണ്ട് തന്നെ എൻഐഎയുടെ അന്വേഷണം അവസാനിക്കുന്നത് വരെ ക്ഷമയോടെ കാത്തിരിക്കണമെന്നും കൂട്ടിച്ചേർത്തു.