'ഉപതെരഞ്ഞെടുപ്പ് ഒഴിവാക്കാൻ സർക്കാർ നീക്കം'; നിർദേശം പ്രതിപക്ഷത്തെ അറിയിച്ചു

തിരുവനന്തപുരം: സംസ്ഥാനത്ത് രണ്ട് നിയമസഭ മണ്ഡലങ്ങളിലേക്ക് നടക്കാനിരിക്കുന്ന ഉപതെരഞ്ഞെടുപ്പ് ഒഴിവാക്കാൻ സംസ്ഥാന സർക്കാർ ഒരുങ്ങുന്നതായി റിപ്പോർട്ട്. സർക്കാർ നിർദേശം പ്രതിപക്ഷത്തെ അറിയിച്ചെന്ന് മാതൃഭൂമി ന്യൂസാണ് റിപ്പോർട്ട് ചെയ്തിരിക്കുന്നത്. കൊവിഡ് സാഹചര്യം കൂടി പരിഗണിച്ചാണ് തെരഞ്ഞെടുപ്പ് കമ്മീഷനെ സമീപിക്കാൻ ഒരുങ്ങുന്നതെന്നാണ് റിപ്പോർട്ടുകൾ.

തെരഞ്ഞടുപ്പ് ഒഴിവാക്കുന്നതുമായി ബന്ധപ്പെട്ട നടപടിയ്ക്ക് പിന്തുണ തേടി മുഖ്യമന്ത്രി സമീപിച്ചെന്ന് പ്രതിപക്ഷ നേതാവ് പറഞ്ഞതായി ഏഷ്യാനെറ്റ് ന്യൂസും റിപ്പോർട്ട് ചെയ്യുന്നു. ഉപതെരഞ്ഞെടുപ്പ് ഒഴിവാക്കണമെന്ന് തെരഞ്ഞെടുപ്പ് കമ്മീഷനോട് ആവശ്യപ്പെടാമെന്ന നിർദേശം ഉണ്ടെന്ന് ഇന്ന് ചേർന്ന യുഡിഎഫ് യോഗത്തിലാണ് രമേശ് ചെന്നിത്തല വ്യക്തമാക്കിയത്.

Also Read: കുട്ടനാട് സീറ്റ് ജോസഫ് വിഭാഗത്തിന് തന്നെ; ജേക്കബ് എബ്രഹാം യുഡിഎഫ് സ്ഥാനാർഥി

എന്നാൽ തദ്ദേശ തെരഞ്ഞെടുപ്പും മാറ്റി വക്കാൻ ആവശ്യപ്പെടുകയാണെങ്കിൽ ഉപതെരഞ്ഞെടുപ്പ് വിഷയത്തിലും സഹകരിക്കാമെന്ന നിലപാടിലാണ് യുഡിഎഫ്. സംസ്ഥാന നിയമസഭയക്ക് ഇനി ആറുമാസത്തോളമേ കാലാവധിയുള്ളൂ. ഈ സാഹചര്യത്തിൽ പുതുതായി തെരഞ്ഞെടുക്കപ്പെടുന്ന എംഎൽഎയ്ക്ക് അഞ്ച് മാസത്തിനടുത്തേ പ്രവർത്തന സമയം ലഭിക്കുകയുള്ളൂ എന്നതാണ് ഉപതെരഞ്ഞെടുപ്പ് ഒഴിവാക്കണമെന്ന ആവശ്യത്തിന് പിന്നിലെ കാരണങ്ങളിലൊന്ന്.

Also Read: അടുത്ത യുഡിഎഫ് മുഖ്യമന്ത്രി ചെന്നിത്തലയോ? പ്രതികരണവുമായി ഉമ്മൻ ചാണ്ടി

രാഷ്ട്രീയ പാർട്ടികൾ ഈ വിഷയത്തിൽ യോജിച്ച തീരുമാനമെടുത്താൽ മാത്രമെ ഇക്കാര്യത്തിൽ എന്തെങ്കിലും നടപടികളുണ്ടാകു. ഇക്കാര്യത്തിൽ യോജിച്ച തീരുമാനമെടുക്കുന്നതിന് മുന്നോടിയായാണ് പ്രതിപക്ഷ നേതാവിനെ മുഖ്യമന്ത്രി ഫോണിൽ ബന്ധപ്പെട്ടത്. അതേസമയം തദ്ദേശ തെരഞ്ഞെടുപ്പും നിയമസഭ ഉപതെരഞ്ഞെടുപ്പും രണ്ടായി തന്നെ കാണണമെന്ന് പ്രതിപക്ഷ നിലപാടിനുള്ള മറുപടിയായി എൽഡിഎഫ് കൺവീനർ വിജയരാഘവൻ പറഞ്ഞു.