സംസ്ഥാനത്ത് എച്ച് 1 എൻ 1 പനിക്കെതിരെ ജാഗ്രത വേണമെന്ന് ആരോഗ്യവകുപ്പ്

തിരുവനന്തപുരം: പ്രളയമുണ്ടായതിന്റെ പശ്ചാത്തലത്തിൽ സംസ്ഥാനത്ത് ആരോഗ്യവകുപ്പ് എച്ച് വൺ എൻ വൺ ജാഗ്രതാ നിർദേശം പുറപ്പെടുവിച്ചു. മൂന്ന് പേർ ഈ മാസം എച്ച് വൺ എൻ വൺ ബാധിച്ച് സംസ്ഥാനത്ത് മരണമടഞ്ഞു. 38 പേർക്ക് രോഗം സ്ഥിരീകരിക്കുകയും ചെയ്തിരുന്നു.

എല്ലാ ആശുപത്രികളിലും ആവശ്യത്തിനുള്ള മരുന്നുകൾ എത്തിച്ചിട്ടുണ്ട്. ദുരിതാശ്വാസക്യാമ്പുകളിൽ നിരവധി പേർ കഴിയുന്നതിനാൽ രോഗം പകരാനുള്ള സാധ്യത കൂടുതലാണ്. അതിനാൽ സംസ്ഥാനത്തുടനീളം ജാഗ്രതാ നിർദേശം നൽകിയിട്ടുണ്ടെന്നും ആരോഗ്യമന്ത്രി കെ.കെ ശൈലജ അറിയിച്ചു. ഗർഭിണികൾ, അഞ്ച് വയസിൽ താഴെയുള്ള കുട്ടികൾ, 65 വയസിന് മുകളിൽ പ്രായമുള്ളവർ, വൃക്ക, കരൾ, ഹൃദയരോഗികൾ എന്നിവർ കൂടുതൽ ജാഗ്രത പാലിക്കണമെന്ന് ആരോഗ്യവകുപ്പ് നിർദേശിച്ചു.

സാധാരണയിലും കൂടുതലായി പനി, വരണ്ട ചുമ, ജലദോഷം, തൊണ്ടവേദന, വിറയൽ, മൂക്കൊലിപ്പ് എന്നിവയാണ് എച്ച് 1 എൻ 1 പനിയുടെ ലക്ഷണങ്ങൾ. ഈ വർഷം സംസ്ഥാനത്തുടനീളം എച്ച് 1 എൻ 1 ബാധിച്ച് 42 പേരും ഈ മാസം മൂന്ന് പേരും മരിച്ചു. ഈ വർഷം 821 പേർക്ക് രോഗം പിടിപെട്ടതായാണ് ആരോഗ്യവകുപ്പിന്റെ റിപ്പോർട്ട്.