Sabarimala Row: സർക്കാർ നടപടിയെ വിമർശിച്ച് ഹൈക്കോടതി

കൊച്ചി: ശബരിമല സംഘർഷത്തിൽ സ്വീകരിച്ച നടപടിയിൽ സർക്കാരിനെ വിമർശിച്ച് ഹൈക്കോടതി. ശബരിമലയിൽ അക്രമം നടത്തിയ പോലീസിനെതിരെ എന്ത് കൊണ്ട് സർക്കാർ നടപടി സ്വീകരിച്ചില്ലെന്ന് ഹൈക്കോടതി ചോദിച്ചു. ദേവസ്വം ബോർഡിനോട് ശബരിമല നടത്തിപ്പിനെ കുറിച്ച് സർക്കാർ ഓരോ ദിവസവും ആജ്ഞ നൽകേണ്ട ആവശ്യമില്ലെന്നും ഹൈക്കോടതി നിരീക്ഷിച്ചു.

ശബരിമലയിലെ ദൈനംദിന കാര്യങ്ങളിൽ സർക്കാർ ഇടപെടേണ്ട ആവശ്യമില്ല. ഭക്തരെ ആക്രമിച്ചതിനും വാഹനങ്ങൾ തകർത്തത്തിനും സർക്കാർ പോലീസിനെതിരെ നടപടി സ്വീകരിക്കാത്തത് എന്ത് കൊണ്ടാണെന്നും ഹൈക്കോടതി ചോദിച്ചു. ശബരിമലയിൽ അക്രമം നടത്തിയ പോലീസുകാർക്കെതിരെയും നടപടിഎടുക്കണമെന്നാണ് കോടതിയുടെ നിർദേശം.

പമ്പയിൽ മാധ്യമങ്ങളെ തടഞ്ഞ പോലീസ് നടപടിയെയും കോടതി വിമർശിച്ചു. ഭക്തർക്കും മാധ്യമങ്ങൾക്കും ശബരിമലയിൽ ബുദ്ധിമുട്ട് ഉണ്ടാക്കാൻ പാടില്ല. മാധ്യമങ്ങളെ ശബരിമലയിൽ എത്തുന്നതിൽ നിന്ന് തടയേണ്ട എന്ന നിലപാടാണ് ഹൈക്കോടതിക്ക്. ക്രമാസമാധാനത്തിന്റെ പേരിൽ മാധ്യമങ്ങളെ തടയാൻ പാടില്ലെന്നും അവർ അവിടെ എത്തുന്നത് കൊണ്ട് സർക്കാരിന് ഗുണം മാത്രമേ ഉണ്ടാകൂ എന്നും കോടതി നിരീക്ഷിച്ചു.