കടകംപള്ളിയുടെ ഭാര്യയുടെ ഗുരുവായൂര്‍ ക്ഷേത്രദർശനം; പോലീസ് കേസെടുത്തില്ലെന്ന് ഹർജിക്കാരൻ, റിപ്പോർട്ട് തേടി കോടതി

കൊച്ചി: കൊവിഡ്-19 മാർഗനിർദേശങ്ങൾ ലംഘിച്ച് ദേവസ്വം മന്ത്രി കടകം പള്ളി സുരേന്ദ്രൻ്റെ ഭാര്യ ഗുരുവായൂർ ക്ഷേത്രത്തിൽ ദർശനം നടത്തിയ സംഭവത്തിൽ ഹൈക്കോടതി ഇടപെടൽ. കേസ് എടുക്കണമെന്ന് ആവശ്യപ്പെട്ട് സമർപ്പിച്ച ഹർജിയിൽ ഹൈക്കോടതി റിപ്പോർട്ട് തേടി.

Also read: മരങ്ങള്‍ ഒടിഞ്ഞുവീഴാനുള്ള സാധ്യത കൂടുതല്‍; ബുറേവി ശക്തമായാല്‍ ശബരിമല തീര്‍ഥാടനത്തിന് നിയന്ത്രണങ്ങള്‍

മന്ത്രിയുടെ ഭാര്യയ്‌ക്കെതിരെ കേസ് എടുക്കണമെന്ന് ആവശ്യപ്പെട്ട് ബിജെപി നേതാവ് നാഗേഷ് ആണ് ഹർജി നൽകിയത്. കേസ് പതിനാലാം തിയതി വീണ്ടും കോടതി പരിഗണിക്കുമെന്ന് മാതൃഭൂമി ഓൺലൈൻ റിപ്പോർട്ട് ചെയ്‌തു.

ഗുരുവായൂർ ഏകാദശിയുമായി ബന്ധപ്പെട്ടുള്ള ദിവസത്തിൽ മന്ത്രിയുടെ ഭാര്യ സുലേഖ, മരുകൾ, ദേവസ്വം ഭാരവാഹികൾ എന്നിവർ ക്ഷേത്രത്തിൽ ദർശനം നടത്തിയ നടപടി കൊവിഡ് മാർഗനിർദേശങ്ങളുടെ ലംഘനമാണെന്നാണ് ഹർജിക്കാരൻ വ്യക്തമാക്കുന്നത്.

മന്ത്രിയുടെ കുടുംബം ക്ഷേത്ര ദർശനം നടത്തിയ സംഭവം ചൂണ്ടിക്കാട്ടി പോലീസിനെ സമീപിച്ചെങ്കിലും കേസ് രജിസ്‌റ്റർ ചെയ്‌തില്ല. ഇതോടെയാണ് ഹൈക്കോടതിയെ സമീപിച്ചതെന്നും ഹർജിക്കാരൻ വ്യക്തമാക്കിയിരുന്നു. ഇതിന് പിന്നാലെ ഹൈക്കോടതി പോലീസിനോട് വിശദീകരണം തേടുകയും ചെയ്‌തു.

Also Read: കടലിലേക്ക് ഇറങ്ങിയവരെ മടക്കിയയച്ചു, സെക്രട്ടേറിയറ്റിൽ ഉന്നതതലയോഗം വിളിച്ച് മുഖ്യമന്ത്രി; മുന്നറിയിപ്പുമായി തീരത്ത് പോലീസ്

കൊവിഡ് മാർഗനിർദേശങ്ങളും മാനദണ്ഡങ്ങളും നിലനിൽക്കുന്ന സാഹചര്യത്തിൽ മന്ത്രിയുടെ ഭാര്യയും അടുപ്പക്കാരും ക്ഷേത്രത്തിൽ എത്തുകയും ദർശനം നടത്തുകയും ചെയ്‌തു. കൊവിഡ് മാനദണ്ഡങ്ങൾക്ക് വിരുദ്ധമായ നടപടിയാണ് ഉണ്ടായതെന്നുമാണ് ഹർജിക്കാരൻ ആരോപിക്കുന്നത്.