ശബരിമലയില്‍ പ്രശ്നങ്ങളില്ല; സാഹചര്യം മാറിയെന്ന് ഹൈക്കോടതി

കൊച്ചി: ശബരിമലയില്‍ നിലവില്‍ സംഘര്‍ഷങ്ങളും പ്രശ്നങ്ങളുമില്ലെന്ന് ഹൈക്കോടതിയുടെ നിരീക്ഷണം. ശബരിമലയിലെ സാഹചര്യങ്ങള്‍ മാറിയതായും ഹൈക്കോടതി ഡിവിഷന്‍ ബെഞ്ച് നിരീക്ഷിച്ചു. ശബരിമലയിലെത്തിയപ്പോള്‍ പോലീസുകാര്‍ തടഞ്ഞുവെന്ന് ചൂണ്ടിക്കാട്ടി ചാലക്കുടി സ്വദേശികളായ മൂന്ന് പേര്‍ സമര്‍പ്പിച്ച ഹര്‍ജി തീര്‍പ്പാക്കുന്നതിനിടെയായിരുന്നു സര്‍ക്കാരിനനുകൂലമായി ഹൈക്കോടതിയുടെ നിരീക്ഷണമുണ്ടായത്.

കഴിഞ്ഞ മാസം 29ന് ശബരിമല ദര്‍ശത്തിനെത്തിയപ്പോഴാണ് തങ്ങളെ നിലയ്ക്കലില്‍ വെച്ച് പോലീസ് തടഞ്ഞതെന്ന് ഇവര്‍ കോടതിയെ അറിയിച്ചു. എന്നാല്‍ സന്നിധാനത്ത് നാമജപ പ്രതിഷേധം സംഘടിപ്പിക്കുകയും കുഴപ്പങ്ങളുണ്ടാക്കുകയും ചെയ്തതിനാലാണ് ഇവരെ തടഞ്ഞതെന്ന് സര്‍ക്കാര്‍ വിശദീകരിച്ചു. നിലവില്‍ ശബരിമലയില്‍ പ്രശ്നങ്ങളൊന്നുമില്ലെന്നും ഇവര്‍ക്ക് എപ്പോള്‍ വേണമെങ്കിലും ശബരിമലയില്‍ പോകാമെന്നും സര്‍ക്കാര്‍ കോടതിയെ അറിയിച്ചു. ഈ വാദങ്ങള്‍ കേട്ട ശേഷമാണ് ശബരിമലയിലെ സാഹചര്യങ്ങള്‍ മാറിയതായും നിലവില്‍ അവിടെ പ്രശ്നങ്ങളില്ലെന്നും ഹൈക്കോടതി നിരീക്ഷിച്ചത്.