പന്തീരാങ്കാവ് യുഎപിഎ കേസ്: പ്രതികളുടെ ജാമ്യാപേക്ഷ ഇന്ന് വീണ്ടും പരിഗണിക്കും

കോഴിക്കോട്: മാവോയിസ്റ്റ് ബന്ധം ആരോപിച്ച് കോഴിക്കോട് നിന്ന് അറസ്റ്റിലായ സിപിഎം പ്രവര്‍ത്തകരുടെ ജാമ്യാപേക്ഷ ഇന്ന് ഹൈക്കോടതി വീണ്ടും പരിഗണിക്കും. അലൻ ഷുഹൈബിന്‍റെയും താഹയുടെയും അറസ്റ്റ് സംബന്ധിച്ച ഹര്‍ജി ഹൈക്കോടതി കഴിഞ്ഞ ദിവസം പരിഗണിച്ചിരുന്നെങ്കിലും പ്രതികളിൽ ഒരാളുടെ കൈയ്യക്ഷരം പരിശോധിക്കേണ്ടതുണ്ടെന്ന് പോലീസ് വ്യക്തമാക്കുകയായിരുന്നു. അന്വേഷണസംഘം കേസ് ഡയറി കോടതിയിൽ സമര്‍പ്പിച്ചിട്ടുണ്ടെന്നാണ് റിപ്പോര്‍ട്ട്.

കേസ് ആദ്യം പരിഗണിച്ച കോഴിക്കോട് ജില്ലാ സെഷൻസ് കോടതി ഇരുവരുടെയും ജാമ്യാപേക്ഷ നിരസിച്ചതോടെയാണ് പ്രതികള്‍ ഹൈക്കോടതിയെ സമീപിച്ചത്. പോലീസ് വീട്ടിൽ നിന്ന് കണ്ടെടുത്ത ലഘുലേഖകള്‍ അടക്കമുള്ള തെളിവുകള്‍ യുഎപിഎ ചുമത്താൻ പര്യാപ്തമല്ലെന്നാണ് പ്രതികളുടെ വാദം. അതേസമയം, ഇരുവരെയും അറസ്റ്റ് ചെയ്യുമ്പോള്‍ ഓടി രക്ഷപെട്ട മൂന്നാമൻ ഉസ്മാനു വേണ്ടിയുള്ള തെരച്ചിൽ പോലീസ് ഊര്‍ജിതപ്പെടുത്തിയിട്ടുണ്ട്. ഇയാള്‍ക്ക് മറ്റു സംസ്ഥാനങ്ങളിലെ മാവോയിസ്റ്റുകളുാമായി ബന്ധമുണ്ടെന്നാണ് പോലീസ് പറയുന്നത്. ഇയാള്‍ അയൽസംസ്ഥാനങ്ങളിലേയ്ക്ക് രക്ഷപെടാനുള്ള സാധ്യതയും പോലീസ് പരിശോധിക്കുന്നുണ്ട്. മാവോയിസ്റ്റ് അനുകൂല പുസ്തകങ്ങളും ലഘുലേഖകളും അലനും താഹയ്ക്കും എത്തിച്ചു നല്‍കിയിരുന്നത് ഉസ്മാനാണെന്നാണ് പോലീസ് കരുതുന്നത്. ഇയാള്‍ ആയുധങ്ങളുമായി നിലമ്പൂര്‍ കാടുകളിലും വയനാട് മേഖലയിലും പോയിരുന്നതായും പോലീസ് കണ്ടെത്തിയിട്ടുണ്ട്.

Also Read: 'യുഎപിഎ കരിനിയമം'; ദുരുപയോഗം തടയാൻ സർക്കാർ ശ്രമിക്കുമെന്ന് എംഎ ബേബി

അതേസമയം, മാവോയിസ്റ്റുകളെ സഹായിക്കുന്നത് മുസ്ലീം തീവ്രവാദികളാണെന്ന സിപിഎം കോഴിക്കോട് ജില്ലാ സെക്രട്ടറി പി മോഹനൻ്റെ വാദം വിവാദത്തിലായി. സിപിഎം നേതാവിന്‍റെ പ്രസ്താവനയെ സ്വാഗതം ചെയ്ത് ബിജെപിയും രംഗത്തെത്തിയിട്ടുണ്ട്. എന്നാൽ പ്രസ്താവന വിവാദമായതോടെ വിശദീകരണവുമായി പി മോഹനൻ രംഗത്തെത്തി. അലനും താഹയ്ക്കും മാവോയിസ്റ്റ് ബന്ധമുണ്ടെന്ന് കരുതുന്നില്ലെന്നും എന്നാൽ വിഷയത്തിൽ വിശദമായ അന്വേഷണം നടക്കേണ്ടതുണ്ടെന്നും അദ്ദേഹം കൂട്ടിച്ചേ‍ര്‍ത്തു.

Also Read: 'ചെറുപ്പക്കാർക്ക് നേരെ യുഎപിഎ ചുമത്തരുതായിരുന്നെന്ന് സിപിഎം സെക്രട്ടറിയേറ്റ്