പനിച്ചൂടിൽ വലഞ്ഞ് കേരളം; പനിമരണങ്ങൾ തുടര്‍ക്കഥയാകുന്നു

തിരുവനന്തപുരം: സംസ്ഥാനം പനിച്ചൂടിൽ പൊള്ളിയുലയുന്നു. പകര്‍ച്ചവ്യാധികള്‍ വ്യാപിക്കുന്നത് തടയാനുള്ള പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമായി നടക്കുമ്പോഴും സംസ്ഥാനത്ത് പനി മരണങ്ങള്‍ തുടര്‍ക്കഥയാവുകയാണ്. കഴിഞ്ഞ ദിവസം മാത്രം പനി ബാധിച്ച്‌ മരിച്ചത് 14 പേരാണ്.

ഡെങ്കിപ്പനി ബാധിച്ച്‌ തിരുവനന്തപുരം ജില്ലക്കാരായ രണ്ടു പേരും, പാലക്കാട് ജില്ലക്കാരായ നാലുപേരും മരണത്തിന് കീഴടങ്ങി. എച്ച്‌ 1 എന്‍ 1 ബാധ മൂലം തിരുവനന്തപുരം, എറണാകുളം ജില്ലകളില്‍ രണ്ടു പേര്‍ വീതവും മരണപ്പെട്ടു. പകര്‍ച്ചപ്പനി ബാധിച്ച്‌ തിരുവനന്തപുരത്ത് ഒരാളും, എലിപ്പനി ബാധിച്ച്‌ തൃശൂരിലും, കോഴിക്കോടും ഓരോ ആൾക്കാര്‍ വീതവും മരണപ്പെട്ടു.

സംസ്ഥാനത്ത് കഴിഞ്ഞ ദിവസം മാത്രം 183 പേര്‍ക്കാണ് ഡെങ്കിപ്പനി സ്ഥിരീകരിച്ചത്. തിരുവനന്തപുരത്താണ് ഏറ്റവും കൂടുതല്‍ പേര്‍ക്ക് ഡെങ്കിപ്പനി സ്ഥിരീകരിച്ചിട്ടുള്ളത്. കഴിഞ്ഞദിവസം മാത്രം സംസ്ഥാനത്ത് പനി ബാധിച്ച്‌ 23,000 പേരാണ് വിവിധ ആശുപത്രികളിലായി ചികിത്സ തേടിയത്.

പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമാക്കാന്‍ ആരോഗ്യവകുപ്പ് ജീവനക്കാരെയും സന്നദ്ധ സംഘടന പ്രവര്‍ത്തകരെയും ചുമതലപ്പെടുത്തി. പ്രതിരോധ പ്രവര്‍ത്തനങ്ങള്‍ക്ക് റാപ്പിഡ് ആക്ഷന്‍ ഫോഴ്സിനെ നിയോഗിക്കാന്‍ തീരുമാനിച്ചിട്ടുള്ളതായി ആരോഗ്യ വകുപ്പ് ഡയറക്ടര്‍ അറിയിച്ചു.

kerala in grip of Viral Fever; more than 100 deaths so far

kerala in grip of Viral Fever; more than 100 deaths so far across Kerala