മാധ്യമപ്രവ‍ത്തകന് പോലീസ് മ‍ര്‍ദ്ദനം: പ്രതിഷേധ കൂട്ടായ്മ ഇന്ന്

തിരുവനന്തപുരം: കേരളകൗമുദി ലേഖകനെ പൊലീസ് വീട്ടിൽ കയറി മർദ്ദിച്ച സംഭവത്തിൽ പ്രതിഷേധക്കൂട്ടായ്മ ഇന്ന് വൈകിട്ട്. വർക്കല ലേഖകൻ സജീവ് ഗോപാലനെ വർക്കല എസ്.ഐ കെ.ആർ ബിജുവിന്റെ നേതൃത്വത്തിലുള്ള പൊലീസ് സംഘം മർദ്ദിച്ചെന്നാണ് ആരോപണം.

ഭാര്യ ദീപയുടെയും ഒമ്പതാം ക്ളാസ് വിദ്യാർത്ഥിനിയായ മകളുടെയും സാന്നിദ്ധ്യത്തിലായിരുന്നു മര്‍ദ്ദനം.
ഗുരുതരമായി പരിക്കേറ്റ സജീവ് വർക്കല താലൂക്ക് ആശുപത്രിയിൽ ചികിത്സയിലാണ്.

സംഭവത്തെക്കുറിച്ച് സജീവ് പറയുന്നത് ഇങ്ങനെ.. ഞായറാഴ്‌ച രാത്രി 10 മണിയോടെയാണ് സംഭവം . വീട്ടിൽ വിരുന്നെത്തിയ ബന്ധുക്കൾ ഭക്ഷണം കഴിഞ്ഞ് പോകാനിറങ്ങുമ്പോൾ യാത്രയാക്കാൻ പുറത്തിറങ്ങിയ സജീവിനെ ബൈക്കിൽ എത്തിയ രണ്ട് പൊലീസുകാർ അകാരണമായി മർദ്ദിക്കുകയായിരുന്നു. തുടർന്ന് എസ്.ഐ ബിജുവിനെ പൊലീസുകാർ വയർലസിൽ ബന്ധപ്പെട്ടു. നിമിഷങ്ങൾക്കുള്ളിൽ എസ്.ഐയും സംഘവും സ്ഥലത്തെത്തി.

സംഭവമെന്തെന്ന് തിരക്കും മുമ്പ് തന്നെ സജീവിന്റെ കവിളിൽ എസ്.ഐ അടിച്ചു. അടി കൊണ്ട് വീടിനുള്ളിലേക്ക് ഓടിക്കയറിയ സജീവിനെ പിന്തുടർന്ന എസ്.ഐയും മറ്റു നാലു പൊലീസുകാരും ചേർന്ന് പൊതിരെ മർദ്ദിക്കുകയായിരുന്നു. തടസം പിടിക്കാനെത്തിയ ഭാര്യയെ അസഭ്യം പറയുകയും ഭീഷണിപ്പെടുത്തുകയും ചെയ്തു. ബഹളം കേട്ട് സമീപവാസികൾ ഓടിയെത്തിയെങ്കിലും പൊലീസ് അടങ്ങിയില്ല.

കുറച്ച് ദിവസങ്ങൾക്ക് മുമ്പ് ഇടവയിൽ രണ്ട് പെൺകുട്ടികൾ ആക്രമിക്കപ്പെട്ട സംഭവവുമായി ബന്ധപ്പെട്ട് കേരളകൗമുദി വാർത്ത നൽകിയിരുന്നു. ഇതിലുള്ള അമർഷമാണിതെന്നാണ് സജീവ് ആരോപിക്കുന്നത്.

സംഭവത്തെക്കുറിച്ച് അടിയന്തര അന്വേഷണം നടത്തി റിപ്പോർട്ട് നൽകാൻ ഡി.ജി.പി ലോക് നാഥ് ബഹ്റ റൂറൽ എസ്.പി അശോക് കുമാറിന് നിർദ്ദേശം നൽകിയിട്ടുണ്ട്.

മാധ്യമ പ്രവർത്തകനെ വീട്ടിൽ കയറി ആക്രമിച്ച എസ്‌ഐ അടങ്ങുന്നില്ല. എന്നാല്‍ പരാതി പിന്‍വലിച്ചാല്‍ വിട്ടയക്കാമെന്ന ഭീഷണിയോടെ സജീവന്‍റെ മരുമകനെയും എസ് ഐ കസ്റ്റഡിയിലെടുത്തെന്നും ആരോപണമുണ്ട്.

സംഭവത്തിൽ ഇന്ന് വൈകിട്ട് 5 മണിക്ക് വർക്കലയിൽ പ്രതിക്ഷേധ കൂട്ടായ്മ നടത്തും. വി ജോയ് എം എല്‍‌ എ . വർക്കല കഹാർ, അജി എസ് ആർ എം, വർക്കല ചെയർപേഴ്‌സൺ , ശിവഗിരി ധർമ്മസംഘം ട്രസ്റ്റ് സെക്രട്ടറി സ്വാമി സാന്ദ്രാനന്ദ, എന്നിവർ പങ്കെടുക്കും'

Kerala journalist attacked by Police:

Kerala Koumudi Reporter Sajeev Gopalan was attacked by police.