എല്ലാവരും സ്വപ്നയ്ക്കു പിന്നാലെ പോയി; സർക്കാർ വികസനത്തിനു പിന്നാലെയും: ഒ രാജഗോപാൽ

തിരുവനന്തപുരം: എല്ലാവരും സ്വപ്നയുടെ പിന്നാലെ പോയപ്പോൾ സർക്കാർ വികസനത്തിനു പിന്നാലെയാണ് പോയതെന്ന് ബിജെപി എംഎൽഎ ഒ രാജഗോപാൽ. സർക്കാർ ജനങ്ങൾക്കുള്ള ആനുകൂല്യങ്ങൾ വിതരണം ചെയ്യുന്നതിലാണ് ശ്രദ്ധിച്ചതെന്നും രാജഗോപാൽ പറഞ്ഞു.

"കുറേ നാളുകളായിട്ട് സ്വർണ്ണക്കടത്തും സ്വപ്നയുമൊക്കെയായി കഴിഞ്ഞു കൂടുകയായിരുന്നു. അതായിരുന്നു വാർത്തയും, എല്ലാവർക്കും താൽപര്യവും. പക്ഷേ അതിനിടയിൽ സർക്കാരിന്റെ പ്രവർത്തനങ്ങൾ നടന്നു പോകുന്നുണ്ടല്ലോ. കേന്ദ്രം നൽകുന്ന ആനുകൂല്യങ്ങൾ വിതരണം ചെയ്യുന്നു, ജനങ്ങളെ സംബന്ധിച്ച് അതാണ് താൽപര്യം. അവർക്ക് കിട്ടേണ്ടതായിട്ടുള്ളത് കിട്ടുന്നുണ്ട്. അവർ തൃപ്തരാണ്." ഒ രാജഗോപാൽ പറഞ്ഞു.

അതേസമയം, കോർപ്പറേഷനിൽ ബിജെപിയെ പരാജയപ്പെടുത്താൻ എൽഡിഎഫും യുഡിഎഫും പരസ്പരം വോട്ടുമറിച്ചെന്ന ബിജെപി സംസ്ഥാന അധ്യക്ഷൻ കെ സുരേന്ദ്രന്റെ ആരോപണം ഒ രാജഗോപാൽ തള്ളി. തിരുവനന്തപുരത്ത് ഭരണം കിട്ടാതെ പോയതിന് കാരണം ക്രോസ് വോട്ടാണെന്ന് താൻ പറയില്ല. അങ്ങനെ പാർട്ടിക്കുള്ളിൽ ഒരു പരാതിയോ തെളിവുകളോ ഇല്ലെന്നു രാജഗോപാൽ പറഞ്ഞു. തെരഞ്ഞെടുപ്പിന് മുൻപ് ഉണ്ടായിരുന്ന അനുകൂല സാഹചര്യം മുതലാക്കാൻ ആയില്ല. ശോഭ സുരേന്ദ്രന്റെ പരാതി പരിഹരിക്കേണ്ടതായിരുന്നു. സ്ഥാനാർഥി നിര്‍ണ്ണയത്തിൽ പ്രശ്നങ്ങളുണ്ടായി, രാജഗോപാൽ പറഞ്ഞു.

ജനങ്ങളുടെ പ്രീതി നേടുന്ന കാര്യത്തിൽ വേണ്ടത്ര വിജയിച്ചില്ല. കൂടുതൽ ജനസേവനത്തിൽ ഏർപ്പടണം. അപ്പോഴേ ജയിക്കാൻ സാധിക്കൂ. എൽഡിഎഫിന് അതിന് സാധിച്ചുവെന്നും രാജഗോപാൽ പറഞ്ഞു. ശോഭ സുരേന്ദ്രനെ പിന്തുണക്കുന്ന നേതാക്കളുടെ കൂട്ടത്തിലാണ് ഒ രാജഗോപാലും. ഫലം വിലയിരുത്തുമ്പോൾ നേതൃത്വത്തിനെതിരെ കടുത്ത വിമര്‍ശനമാണ് അതൃപ്തരായ നേതാക്കളുടെ ഭാഗത്ത് നിന്ന് ഉണ്ടാകുന്നത്.