വോട്ട് രേഖപ്പെടുത്തേണ്ടത് എങ്ങനെ? പോളിങ് ബൂത്തിലെ നടപടിക്രമങ്ങൾ

കൊച്ചി: സംസ്ഥാനത്ത് തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് അടുത്തിരിക്കുകയാണ്. ഡിസംബർ 8, 10, 14 തീയതികളിലായി മൂന്ന് ഘട്ടങ്ങളിലാണ് തെരഞ്ഞെടുപ്പ്. പഞ്ചായത്ത്/മുനിസിപ്പാലിറ്റി/കോർപ്പറേഷൻ, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവിടങ്ങളിലേക്കുള്ള സ്ഥാനാർഥികൾക്കാണ് വോട്ട് രേഖപ്പെടുത്തേണ്ടത്.

ആദ്യമായി സമ്മതിദാനാവകാശം വിനിയോഗിക്കാൻ ഒരുങ്ങുന്ന വോട്ടർമാർക്ക് ബൂത്തിലെത്തുമ്പോൾ എന്തൊക്കെയാകും നടപടിക്രമങ്ങളെന്ന സംശയങ്ങൾ ഉണ്ടായേക്കാം. സംശയങ്ങളേതുമില്ലാതെ വോട്ട് ചെയ്യേണ്ടത് എങ്ങിനെയെന്ന് അറിയാം.

Also Read : കൊവിഡ് ചികിത്സയിലും ക്വാറന്റൈനിലും കഴിയുന്നവർക്ക് എങ്ങനെ വോട്ട് ചെയ്യാം?

തെരഞ്ഞെടുപ്പ് കമ്മിഷൻ അംഗീകരിച്ച ഫോട്ടോ പതിച്ച തിരിച്ചറിയൽ കാർഡിൽ ഏതെങ്കിലും ഒന്നുമായി വേണം പോളിങ് ബൂത്തിലേക്ക് പോകാൻ. കൊവിഡ് സാഹചര്യത്തിൽ ഏർപ്പെടുത്തിയിരിക്കുന്ന മാർഗനിർദേശങ്ങൾ പാലിച്ച് പോളിങ് ബൂത്തിനകത്ത് എത്തിയാൽ പ്രധാനമായും നാല് സ്റ്റെപ്പുകളാണ് വോട്ട് ചെയ്യുന്നതിന് മുൻപായി ഉള്ളത്.

ബൂത്തിനകത്ത് എത്തുമ്പോൾ ഒന്നാമത്തെ പോളിങ് ഓഫീസർ വോട്ടർമാരുടെ രേഖകൾ പരിശോധിക്കുകയാണ് ചെയ്യുക. തിരിച്ചറിയൽ കാർഡും വോട്ടോഴ്സ് ലിസ്റ്റിലെ പേരും പരിശോധിക്കുകയാണ് ഇവിടെ ചെയ്യുന്നത്.

രണ്ടാമത്തെ പോളിങ്ങ് ഓഫീസർ വോട്ടറുടെ ഇടതുകൈയ്യിലെ ചൂണ്ടുവിരലിൽ മഷി പുരട്ടും. രജിസ്ട്രറിൽ ഒപ്പിട്ടശേഷം വോട്ടിങ് സ്ലിപ്പ് നൽകും.

Also Read : രണ്ട് ഭാര്യമാരെയും ഒരുമിച്ച് ഗർഭിണികളാക്കണം; യുവാവിന്റെ ആഗ്രഹത്തിന് പിന്നിൽ?

മൂന്നാമത്തെ ഓഫീസറുടെ അരികിലെത്തി വോട്ടിങ് സ്ലിപ്പും മഷിപുരട്ടിയ വിരലും കാണിക്കുക. അടുത്ത സ്റ്റെപ്പായാണ് വോട്ട് രേഖപ്പെടുത്തേണ്ടത്.

വോട്ടിങ്ങ് മെഷീനിൽ പച്ച നിറത്തിലുള്ള ബൾബ് പ്രകാശിക്കുമ്പോൾ നിങ്ങൾക്ക് താൽപ്പര്യമുള്ള സ്ഥാനാർഥിയുടെ പേരിനും ചിഹ്നത്തിനും നേരെയുള്ള ബട്ടൺ (നീല നിറത്തിൽ ഉള്ളത്) അമർത്തി ബീപ് ശബ്ദം ഉറപ്പ് വരുത്തണം. ഇതേസമയം പച്ച ബൾബ് അണഞ്ഞ് ചുവന്ന ബൾബ് കത്തുകയും ചെയ്യും. വോട്ട് രേഖപ്പെടുത്തി എന്നതിന്‍റെ സൂചനയാണിത്. ഗ്രാമ പഞ്ചായത്ത് പരിധിയിലുള്ളവർ ആദ്യത്തെ വോട്ടിന് ശേഷം ബ്ലോക്ക് പഞ്ചായത്തിലെ സ്ഥാനാർഥികളുടെ വിവരങ്ങളുള്ള വോട്ടിങ്ങ് മെഷീനിലും പിന്നീട് ജില്ലാ പഞ്ചായത്ത് സ്ഥാനാർഥികളുടെ പേരു വിവരങ്ങൾ ഉള്ള വോട്ടിങ് മെഷീനിലും സമാനമായ രീതിയിൽ വോട്ട് രേഖപ്പെടുത്തണം.