ചര്‍ച്ച പരാജയം: 24 മുതൽ നഴ്സുമാരുടെ അനിശ്ചിതകാലസമരം

തിരുവനന്തപുരം: ശമ്പളപരിഷ്കരണം വേഗത്തിലാക്കുന്നതുമായി ബന്ധപ്പെട്ട് നഴ്സുമാരുടെ സംഘടന പ്രതിനിധികള്‍ ലേബര്‍ കമ്മീഷണറുമായി നടത്തിയ ചര്‍ച്ച പരാജയം. ഏപ്രിൽ 24 മുതൽ അനിശ്ചിതകാല സമരവുമായി യുഎൻഎ മുന്നോട്ടു പോകുമെന്ന് സംഘടനാ നേതാവ് ജാസ്മിൻ ഷാ പറഞ്ഞു.

കഴിഞ്ഞ വര്‍ഷം ജൂലൈയിലാണ് മുഖ്യമന്ത്രിയുടെ നിര്‍ദേശപ്രകാരം ഉണ്ടാക്കിയ കമ്മറ്റിയുടെ നിര്‍ദേശപ്രകാരം നഴ്സുമാരുടെ അലവൻസ് അടക്കമുള്ള കാര്യങ്ങള്‍ തീരുമാനിച്ചത്. അന്നത്തെ പ്രഖ്യാപനം അനുസരിച്ചുള്ള വിജ്ഞാപനം തന്നെ ഇറങ്ങണമെന്നാണ് തങ്ങളുടെ നിലപാടെന്നും അദ്ദേഹം പറഞ്ഞു. നഴ്സുമാരുടെ മിനിമം വേതനം 20000 രൂപയാക്കിക്കൊണ്ടുളള പ്രഖ്യാപനം വന്ന് എട്ടുമാസം പിന്നിട്ടിട്ടും ഇതു സംബന്ധിച്ച സര്‍ക്കാര്‍ ഉത്തരവ് പുറത്തിറങ്ങിയിട്ടില്ല.

സമരം മാറ്റിവെച്ച് ഇനി ചര്‍ച്ചയ്ക്കില്ലെന്നും വിജ്ഞാപനം ഇറങ്ങാതെ ഇനി ഒരു വിട്ടുവീഴ്ചയ്ക്കും തയ്യാറല്ലെന്നും നഴ്സുമാരുടെ പ്രതിനിധികളെ ഉദ്ധരിച്ച് മാതൃഭൂമി റിപ്പോര്‍ട്ട് ചെയ്തു. ശമ്പളപരിഷ്കരണം സംബന്ധിച്ച് ഉത്തരവ് ഇറക്കണമെന്ന് ആവശ്യപ്പെട്ട് ലോങ് മാര്‍ച്ചോടുകൂടിയായിരിക്കും സമരം ആരംഭിക്കുക. സമരം നടക്കുന്ന ചേര്‍ത്തല കെവിഎം ആശുപത്രി മുതൽ തിരുവനന്തപുരത്ത് സെക്രട്ടറിയേറ്റിലേയ്ക്ക് ആയിരിക്കും ലോങ് മാര്‍ച്ച് സംഘടിപ്പിക്കുക.