പുതിയ ക്വാറികൾ തുടങ്ങാൻ സർക്കാർ ഒത്താശ; പ്രളയാനന്തരം 119 എണ്ണത്തിന് അനുമതി നൽകി: ചെന്നിത്തല

തിരുവനന്തപുരം: പുതിയ ക്വാറികൾ തുടങ്ങാൻ സർക്കാർ ഒത്താശ ചെയ്യുകയാണെന്ന് പ്രതിപക്ഷ നേതാവ് രമേശ് ചെന്നിത്തല. മഹാ പ്രളയത്തിനു ശേഷം സർക്കാർ പുതുതായി 119 ക്വാറികൾ ആരംഭിക്കാൻ അനുമതി നൽകിയെന്നും ചെന്നിത്തല പറഞ്ഞു. ഇതുമായി ബന്ധപ്പെട്ട ഫയൽ പുറത്തുവിടാൻ സർക്കാർ തയ്യാറാകണം. വിഷയത്തിൽ സമഗ്ര അന്വേഷണം വേണമെന്നും രമേശ് ചെന്നിത്തല ആവശ്യപ്പെട്ടു.

സംസ്ഥാനം കണ്ട ഏറ്റവും വലിയ കൊള്ളയ്ക്കാണ് സർക്കാർ കൂട്ടുനിൽക്കുന്നത്. 1964ലെ ഭൂ പതിവ് ചട്ടങ്ങളിൽ ഭേതഗതി വരുത്തിയത് പുതിയ ക്വാറികൾക്ക് അനുമതി നൽകാനാണെന്നും ചെന്നിത്തല ആരോപിച്ചു. മന്ത്രിസഭാ യോഗത്തിൽ ഔട്ട് ഓഫ് അജണ്ടയായി ഇതു കൊണ്ടുവന്നത് വ്യവസായ മന്ത്രി ഇ പി ജയരാജനാണെന്നും ചെന്നിത്തല വ്യക്തമാക്കി.

റവന്യു മന്ത്രി ഇ ചന്ദ്രശേഖരനെ ഇരുട്ടിൽ നിർത്തിയാണ് 2019 മാർച്ച് അഞ്ചിന് മന്ത്രിസഭ യോഗത്തിൽ വ്യവസായ മന്ത്രി ഇക്കാര്യം കൊണ്ടുവന്നത്. ഇതിൽ റവന്യൂ മന്ത്രിയും സിപിഐയും നിലപാട് വ്യക്തമാക്കണമെന്നും ചെന്നിത്തല പറഞ്ഞു. അതേ ദിവസം തീരുമാനിച്ച കർഷകരുടെ മോറട്ടോറിയം വിഷയത്തിൽ തുടർ തീരുമാനം ഉണ്ടായില്ലെന്നും ചെന്നിത്തല കുറ്റപ്പെടുത്തി. അതേസമയം 24 മണിക്കൂറിനുള്ളിൽ ക്വാറിക്കുവേണ്ടിയുള്ള ഉത്തരവിറങ്ങിയെന്നും ഇത് സംശയാസ്പദമാണെന്നും അദ്ദേഹം പറഞ്ഞു.