കോഴിയില്‍ നിന്ന് നിപ്പ: വ്യാജ സന്ദേശം പ്രചരിപ്പിച്ചയാള്‍ക്കെതിരെ കേസ്

കണ്ണൂര്‍: കോഴികളിലൂടെ നിപാ വൈറസ് വ്യാപകമാകുന്നുവെന്ന വ്യാജ സന്ദേശം പ്രചരിപ്പിച്ചയാള്‍ക്കെതിരെ കേസ്. മൂവാറ്റുപുഴ സ്വദേശി പി.എം സുനില്‍കുമാറിനെതിരെയാണ് (28) കേസെടുത്തത്. ജില്ലാ പൊലീസ് മേധാവിയുടെ നിര്‍ദ്ദേശപ്രകാരമാണ് കേസെടുത്തതെന്ന് കണ്ണൂര്‍ ടൗണ്‍ എസ്‌ഐ ശ്രീജിത്ത് കോടേരി പറഞ്ഞു. ഷെയര്‍ ചെയ്യൂ ജീവന്‍ രക്ഷിക്കൂ എന്ന ആഹ്വാനത്തോടെയാണ് ഇയാള്‍ വാട്‌സ്‌ആപ്പ് സന്ദേശം പ്രചരിപ്പിച്ചത്.

കോഴിക്കോട് നിന്നെത്തിച്ച ബ്രോയിലര്‍ കോഴികളില്‍ നിപ വൈറസ് സാനിദ്ധ്യം കണ്ടെത്തിയെന്നും പൂനെ ഇന്‍സ്റ്റിറ്റ്യൂട്ട് ഓഫ് വൈറോളജി ഡയറക്ടര്‍ ഡോ.ആനന്ദ് ബസു അറിയിച്ചെന്നായിരുന്നു വാട്സ് ആപ്പ് സന്ദേശം. ഈ വിഷത്തില്‍ കൂടുതല്‍ പഠനം നടക്കുകയാണെന്നും അതിനാല്‍ ഇറച്ചി കോഴികളെ ഉപയോഗിക്കുന്നത് നിര്‍ത്തണമെന്നുമായിരുന്നു സന്ദേശം.

വാട്‌സ്‌ആപ്പ് സന്ദേശത്തിന് പുറമെ കോഴിക്കോട് ജില്ലാ മെഡിക്കല്‍ ഓഫീസര്‍ ഔദ്യോഗിക ലെറ്റര്‍പാഡില്‍ നല്‍കിയ സന്ദേശമെന്ന പേരില്‍ മറ്റൊരു വ്യാജ സന്ദേശം കൂടി പ്രചരിക്കുന്നുണ്ട്. 60 ശതമാനം കോഴികളിലും നിപ്പ വൈറസിന്റെ സാന്നിധ്യം കണ്ടെത്തിയെന്നും ഇനിയൊരു അറിയിപ്പുണ്ടാകുന്നത് വരെ കോഴിയിറച്ചി കഴിക്കരുതെന്നാണ് വ്യാജ സന്ദേശം. സന്ദേശം പ്രചരിച്ചതോടെ ഇറച്ചി കോഴിവിലയില്‍ ഗണ്യമായ ഇടിവുണ്ടായി. സന്ദേശം കണ്ട് സംസ്ഥാന ആരോഗ്യ വകുപ്പുമായി കോഴി വ്യാപാരികള്‍ ബന്ധപ്പെട്ടപ്പോഴാണ് ഇത് വ്യാജമാണെന്ന് വ്യക്തമായത്