കേരളത്തില് കൊവിഡ് ദേശീയ നിരക്കിന്റെ ഇരട്ടി
കേരളത്തിലെ കൊവിഡ് വളര്ച്ചാ നിരക്ക് 3.38 ശതമാനമാണ്. ഛത്തീസ്ഗഢ് ഒഴികെ മറ്റെല്ലാ സംസ്ഥാനങ്ങളെക്കാളും വേഗത്തില് കേരളത്തില് നിലവില് കൊവിഡ് കേസുകള് ഉയരുന്നു. ഛത്തീസ്ഗഢില് കൊവിഡ് കേസുകള് ക്രമാതീതമായി ഉയരുകയാണ്. ദേശീയ വളര്ച്ചാ നിരക്ക് ഇപ്പോള് പ്രതിദിനം വെറും 1.63 ശതമാനമാണ്. അതായത് കേരളം ദേശീയ നിരക്കിന്റെ ഇരട്ടിയിലധികം വളരുകയാണ്.
വ്യാഴാഴ്ച കേരളത്തില് 6,324 രോഗബാധ
കേരളത്തില് വ്യാഴാഴ്ച 6,324 പുതിയ കൊവിഡ് കേസുകളാണ് റിപ്പോര്ട്ട് ചെയ്തത്. ഇതുവരെ സംസ്ഥാനത്ത് റിപ്പോര്ട്ട് ചെയ്യുന്ന ഏറ്റവും ഉയര്ന്ന രോഗബാധയാണത്. ബുധനാഴ്ച സംസ്ഥാനത്ത് 5,376 രോഗബാധയാണ് റിപ്പോര്ട്ട് ചെയ്തത്, ആദ്യമായി 5,000 കടക്കുന്നതും ആദ്യമായാണ്. കേരളത്തില് നിലവില് 1.54 ലക്ഷത്തിലധികം സ്ഥിരീകരിച്ച കേസുകളാണുള്ളത്. വിവിധ ആശുപത്രികളിലായി 46,000 സജീവ കേസുകളാണുള്ളത്.
കേരളം ഗുരുതരാവസ്ഥയില്
കേരളം ഗുരുതരാവസ്ഥയിലേക്കാണ് നീങ്ങുന്നതെന്ന് മുഖ്യമന്ത്രി പിണറായി വിജയന്. 'പല ജില്ലകളിലും പോസിറ്റീവ് കേസുകളുടെ എണ്ണത്തില് കുത്തനെ വര്ധനവ് ഉണ്ടായിട്ടുണ്ട്. നമ്മള് ഗുരുതരമായ ഒരു അവസ്ഥയിലേക്ക് നീങ്ങുകയാണ്', മുഖ്യമന്ത്രി പറഞ്ഞു. വ്യാഴാഴ്ച കോഴിക്കോട് ജില്ലയിലാണ് ഏറ്റവും അധികം കൊവിഡ് കേസുകള് റിപ്പോര്ട്ട് ചെയ്തത്. 883 പേര്ക്കാണ് കോഴിക്കോട് ജില്ലയില് കൊവിഡ് സ്ഥിരീകരിച്ചത്.
കേരളത്തില് രോഗമുക്തി കുറവ്
രാജ്യത്ത് കഴിഞ്ഞ ആറ് ദിവസങ്ങളായി പുതിയ കേസുകളേക്കാള് അധികം രോഗമുക്തിയാണ് റിപ്പോര്ട്ട് ചെയ്യുന്നത്. എന്നാല്, കേരളത്തില് നേരെ തിരിച്ചാണ്. രോഗമുക്തിയേക്കാള് അധികം രോഗബാധയാണ് റിപ്പോര്ട്ട് ചെയ്യുന്നത്. വ്യാഴാഴ്ച സംസ്ഥാനത്ത് 3,168 പേര് മാത്രമാണ് കൊവിഡ് രോഗമുക്തി നേടിയത്. അതായത്, റിപ്പോര്ട്ട് ചെയ്ത രോഗബാധയുടെ പകുതി മാത്രം പേരാണ് ഇന്നലെ രോഗമുക്തി നേടിയത്.