ഓണാവധിക്കും പ്രളയത്തിനും ശേഷം ഇന്ന് സ്കൂളുകള്‍ തുറക്കും

തിരുവനന്തപുരം: ഓണാവധിക്കും പ്രളയത്തിനും ശേഷം സംസ്ഥാനത്തെ സ്കൂളുകള്‍ ഇന്ന് തുറക്കും. പ്രളയബാധിത പ്രദേശങ്ങളിലെ 270 സ്കൂളുകള്‍ ഒഴികെയുള്ളവയാണ് ഇന്ന് തുറക്കുക. ആലപ്പുഴ ജില്ലയില്‍ മാത്രം തുറക്കാന്‍ കഴിയാത്ത 217 സ്കൂളുകളാണ് നിലവിലുള്ളത്.

വെള്ളം പൂര്‍ണമായും ഇറങ്ങിയിട്ടില്ല എന്നതാണ് ആലപ്പുഴ ജില്ലയിലെ സ്കൂളുകള്‍ നേരിടുന്ന പ്രധാന വെല്ലുവിളി. കുട്ടനാട് മേഖലയില്‍ നൂറോളം സ്കൂളുകള്‍ ഇപ്പോഴും വെള്ളത്തിലാണ്. ആലപ്പുഴ ജില്ലയിലെ പ്രൊഫഷണല്‍ കോളേജുകള്‍ ആടക്കമുള്ള വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധിയാണ്. അടുത്ത ആഴ്ചയോടുകൂടി മുഴുവന്‍ സ്കൂളുകളും തുറക്കാന്‍ സാധിക്കുമെന്ന് വിദ്യാഭ്യാസ മന്ത്രി ആത്മവിശ്വാസം പ്രകടിപ്പിച്ചു.

അധ്യയനം ആരംഭിക്കാന്‍ കഴിയാത്ത സ്കൂളുകളില്‍ പകരം സംവിധാനം ഒരുക്കാന്‍ തദ്ദേശ സ്ഥാപനങ്ങള്‍ക്കും പിടിഎയ്ക്കും വിദ്യാഭ്യാസ വകുപ്പ് നിര്‍ദ്ദേശം നല്‍കിയിട്ടുണ്ട്. ദുരിതാശ്വാസ ക്യാമ്പുകളായി പ്രവര്‍ത്തിക്കുന്ന സ്കൂളുകള്‍ക്ക് പകരം മറ്റ് സംവിധാനങ്ങള്‍ കണ്ടെത്തി ക്ലാസുകള്‍ ആരംഭിക്കാനാണ് ശ്രമം. വിദ്യാര്‍ത്ഥികള്‍ക്ക് നഷ്ടമായ പാഠപുസ്തകങ്ങള്‍ ഉടന്‍ വിതരണം ചെയ്യുമെന്നും വിദ്യാഭ്യാസ മന്ത്രി വ്യക്തമാക്കിയിട്ടുണ്ട്.