സോളാര്‍ തുടരന്വേഷണം: സരിതയുടെ മൊഴിയെടുക്കുന്നു

തിരുവനന്തപുരം: വിവാദമായ സോളാര്‍ കേസില്‍ തുടരന്വേഷണത്തിന്‍റെ ഭാഗമായി പരാതിക്കാരിയായ സരിത എസ്. നായരില്‍ നിന്ന് മൊഴി രേഖപ്പെടുത്തുന്നു. തനിക്കു നേരെ നടന്ന അക്രമങ്ങള്‍ പ്രത്യേക സംഘത്തെ കൊണ്ട് അന്വേഷിപ്പിക്കണമെന്ന് ആവശ്യപ്പെട്ട് കഴിഞ്ഞ വര്‍ഷം ഒക്ടോബറില്‍ മുഖ്യമന്ത്രി പിണറായി വിജയന് നല്‍കിയ പരാതിയുടെ അടിസ്ഥാനത്തിലാണ് സരിതയില്‍ നിന്ന് മൊഴിയെടുക്കുന്നത്.

നേരത്തെ, സരിതയുടെ മുന്‍ അഭിഭാഷകന്‍ ഫെനി ബാലകൃഷ്ണനില്‍ നിന്ന് ക്രൈംബ്രാഞ്ച് സംഘം മൊഴിയെടുത്തിരുന്നു. നേരത്തെ ഉന്നയിച്ചിരുന്ന ആരോപണങ്ങള്‍, സാമ്പത്തിക തട്ടിപ്പ്, പീഡിപ്പിച്ചവരുടെ പേരുവിവരങ്ങള്‍ എന്നിവ ഉള്‍പ്പെടെയുള്ള കാര്യങ്ങള്‍ സരിത കത്തില്‍ ആവര്‍ത്തിക്കുന്നുണ്ട്. ഉമ്മന്‍ചാണ്ടിക്കു പുറമെ തമ്ബാനൂര്‍ രവി, ബെന്നിബഹനാന്‍ എന്നിവര്‍ തന്റെ പ്രയാസങ്ങള്‍ തീര്‍ക്കാമെന്ന് ഉറപ്പു നല്‍കിയിരുന്നതായും സരിത പറയുന്നു. വിവാദമായ സോളാര്‍ കേസിലെ ആരോപണം സംബന്ധിച്ച്‌ പൊതുഅന്വേഷണം നടത്തണമെന്ന് ചൂണ്ടിക്കാട്ടി പിണറായി മന്ത്രിസഭയാണ് ഉത്തരവിറക്കിയത്. ക്രിമിനലും വിജിലന്‍സും ആയ കേസുകള്‍ പ്രത്യേക സംഘത്തെ വെച്ച്‌ പരിശോധിക്കാനാണ് നിര്‍ദേശം.