ഹാമർ വീണ് പരിക്കേറ്റ വിദ്യാർഥിയുടെ ചികിത്സ സർക്കാർ ഏറ്റെടുക്കുമെന്ന് മന്ത്രി

പാലാ: സംസ്ഥാന ജൂനിയര്‍ അത്‌ലറ്റിക് മീറ്റിനിടെ ഹാമര്‍ തലയില്‍ വീണ് ഗുരുതര പരിക്കേറ്റ വിദ്യാര്‍ഥിയുടെ ചികിത്സ സർക്കാർ ഏറ്റെടുക്കുമെന്ന് കായിക മന്ത്രി ഇ.പി ജയരാജൻ. പാലായില്‍ വച്ച് നടക്കുന്ന ജൂനിയര്‍ അത്‌ലറ്റിക് മീറ്റിലാണ് അപകടം ഉണ്ടായത്.

പാലാ സെന്റ് തോമസ് ഹയര്‍ സെക്കന്ററി സ്‌കൂളിലെ പ്ലസ് വണ്‍ വിദ്യാര്‍ഥി ആഫീല്‍ ജോണ്‍സനാണ് പരിക്കേറ്റത്. ആഫീലിനെ ഉടൻ തന്നെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ആഫീലിന് മികച്ച ചികിത്സ നൽകുമെന്ന് മന്ത്രി പറഞ്ഞു. കോട്ടയം കളക്ടർക്കാണ് അഫീലിന്റെ ചികിത്സാ ചുമതല നൽകിയിരിക്കുന്നത്.

Also Read: അത്‌ലറ്റിക് മീറ്റിനിടെ ഹാമര്‍ തലയില്‍ വീണ് വിദ്യാര്‍ഥിക്ക് ഗുരുതര പരിക്ക്

അത്‌ലറ്റിക് മീറ്റില്‍ വോളണ്ടിയറായിരുന്ന ആഫീല്‍ ജാവലിന്‍ ത്രോ മത്സരത്തിന് ശേഷം ജാവലിനുകള്‍ എടുത്തുമാറ്റുന്നതിനിടെയാണ് അപകടം സംഭവിച്ചത്. ഗ്രൗണ്ടില്‍ മറ്റൊരു ഭാഗത്ത് നടന്നിരുന്ന ഹാമര്‍ത്രോ മത്സരത്തില്‍ നിന്നും ഹാമര്‍ വന്ന് വീഴുകയായിരുന്നു.

അത്‌ലറ്റിക് മീറ്റ് അധികൃതരുടെ ഭാഗത്ത് നിന്ന് വീഴ്ച സംഭവിച്ചിട്ടുണ്ടെങ്കിൽ അത് കണ്ടെത്തി നടപടി സ്വീകരിക്കും. കായികമേളകളിൽ സുരക്ഷാ സംവിധനങ്ങൾ ശക്തമാക്കുമെന്ന് മന്ത്രി കൂട്ടിച്ചേർത്തു. മത്സരത്തിൽ മതിയായ സുരക്ഷ ഒരുക്കിയിരുന്നില്ലെന്നും ആരോപണമുണ്ട്.