വൈദ്യുതിക്ക് പുറമെ ഇന്‍റര്‍നെറ്റ് കണക്ഷനും നൽകാനൊരുങ്ങി കെഎസ്ഇബി

തിരുവനന്തപുരം: വൈദ്യുതി കണക്ഷൻ കൂടാതെ ഇന്റർനെറ്റ്‌ കണക്ഷനും നൽകാനൊരുങ്ങി കെഎസ്ഇബി. കെഎസ്ഇബി നൽകുന്ന ഇന്റർനെറ്റ് കണക്ഷൻ ബിപിഎൽ കുടുംബങ്ങൾക്ക് സൗജന്യമായിരിക്കുമെന്നും മാതൃഭൂമി റിപ്പോർട്ട് ചെയ്തു. കേരള ഐടി മിഷനും കെഎസ്ഇബിയും ചേർന്ന് ഒരുക്കുന്ന പദ്ധതി ആറ് മാസത്തിനുള്ളിൽ നടപ്പാക്കാനാണ് തീരുമാനം.

പുതിയ പദ്ധതി നടപ്പിലാകുന്നതോടെ ഇ ഗവർണൻസ് മേഖലയിൽ വലിയ മുന്നേറ്റമുണ്ടാകും. പുതിയ വൈദ്യുതി കണക്ഷന് അപേക്ഷിക്കുന്നവർക്ക് ഇന്റർനെറ്റ് കണക്ഷൻ കൂടി നൽകും. കേരള ഫൈബർ ഒപ്റ്റിക് നെറ്റ്‌വർക് (കെ ഫോൺ) എന്ന പേരിലായിരിക്കും പദ്ധതി അറിയപ്പെടുക. മുഴുവൻ സർക്കാർ ഓഫിസുകളും കെ ഫോൺ നെറ്റ്‍വർക്കിലേക്ക് മാറും.

ഒഎഫ്‌സി കണക്ഷനുകൾ എത്തുന്ന 770 സെക്ഷൻ ഓഫീസുകളിലും വൈദ്യുതി ലൈനുകൾ ഉപയോഗിച്ച് ഒഎഫ്‌സി കേബിളുകൾ വേഗത്തിൽ എത്തിക്കാനാകും. ഒഎഫ്‌സി കണക്ഷനിൽ വരുന്നവർക്ക് സാങ്കേതിക സഹായം നൽകാനും കണക്ഷൻ ആവശ്യമുള്ളവരെ കണ്ടെത്താനും ഐടി മിഷന് സാധിക്കും. 220 കെ.വി സബ്‌സ്റ്റേഷനുകൾ ഒഎഫ്‌സി നെറ്റ്‌വർക്കിൽ ബന്ധിപ്പിച്ചു. 110 കെ.വി, 66 കെ.വി. സബ്‌സ്റ്റേഷനുകളും യുഉടൻ ബന്ധിപ്പിക്കാനുള്ള നടപടികൾ പോർത്തിയായി വരികയാണ്. 2016 ൽ തുടങ്ങിയ പദ്ധതി സാങ്കേതിക കാരണങ്ങളാൽ തടസപ്പെട്ടു നിൽക്കുകയായിരുന്നു. പിന്നീട് ഇപ്പോഴാണ് ഒഎഫ്‌സി കണക്ഷന്റെ പ്രവർത്തനങ്ങൾ ശക്തിപ്പെടുത്തിയത്.