കെഎസ്ആർടിസി മുഴുവൻ സർവ്വീസുകളും ഇന്ന് പുനരാരംഭിക്കും

തിരുവനന്തപുരം: സംസ്ഥാനത്ത് കൊവിഡ് നിയന്ത്രണങ്ങളെത്തുടർന്ന് നിർത്തിവെച്ച കെഎസ്ആർടിസിയുടെ മുഴുവൻ സർവ്വീസുകളും ഇന്ന് പുനഃരാരംഭിക്കും. കെഎസ്ആർടിസി എംഡി ബിജുപ്രഭാകർ ഐഎഎസ് ആണ് ഇക്കാര്യം അറിയിച്ചത്.

സർവ്വീസുകളെല്ലാം പുനഃരാരംഭിക്കാൻ തീരുമാനിച്ചെങ്കിലും ഫാസ്റ്റ് പാസഞ്ചറുകൾ രണ്ട് ജില്ലകളിലും, സൂപ്പർ ഫാസ്റ്റുകൾ നാല് ജില്ലകൾ വരെയും ഓപ്പറേറ്റ് ചെയ്യുന്ന രീതി നിലനിർത്തും. സർവ്വീസ് പുനഃരാരംഭിക്കുന്നതുമായി ബന്ധപ്പെട്ട് എല്ലാ യൂണിറ്റ് ഓഫീസർമാർക്കും നിർദേശം നൽകിക്കഴിഞ്ഞു.

Also Read : 'ശരീരത്തിൽ സ്പര്‍ശിച്ച ശേഷം പിന്തുടര്‍ന്നു'; മാളിൽ വച്ച് അപമാനിക്കുവാന്‍ ശ്രമിച്ചതായി യുവനടി

കൊവിഡ് വ്യാപനത്തെതുടർന്ന് നിയന്ത്രണങ്ങളേർപ്പെടുത്തിയതോടെയായിരുന്നു കെഎസ്ആർടിസി സര്‍വ്വീസുകള്‍ ഭാഗികമായി കുറച്ചത്. ക്രിസ്തുമസ് പുതുവൽസരത്തോടനുബന്ധിച്ച് കെഎസ്ആർടിസി പ്രത്യേക അന്തർ സംസ്ഥാന സർവ്വീസും നടത്തുമെന്ന് ഏഷ്യാനെറ്റ് ന്യൂസും റിപ്പോർട്ട് ചെയ്യുന്നു. ഡിസംബർ 21 മുതൽ ജനുവരി 4 വരെ, കേരളത്തിലെ വിവിധ കേന്ദ്രങ്ങിൽ നിന്ന് ബാംഗ്ലൂരിലേക്കും തിരിച്ചുമായിരിക്കും ഈ സര്‍വ്വീസ്.

10% അധിക നിരക്ക് ഉൾപ്പെടെ എൻഡ് ടു എൻഡ് യാത്രാനിരക്കാണ് ഈടാക്കുകയെന്ന് മലയാള മനോരമയും റിപ്പോർട്ട് ചെയ്യുന്നു. യാത്ര ചെയ്യുന്ന സംസ്ഥാനത്തിന്റെ കൊവിഡ് മാനദണ്ഡങ്ങൾ യാത്രക്കാർ പാലിക്കേണ്ടതുണ്ട്.

Also Read : തെരഞ്ഞെടുപ്പിന് പിന്നാലെ കോൺഗ്രസിൽ എതിർപ്പ് പരസ്യമാക്കി നേതാക്കൾ; ലക്ഷ്യം മുല്ലപ്പള്ളിയും ചെന്നിത്തലയുമോ?

ബെംഗളൂരുവിൽ നിന്ന്, എറണാകുളത്തേക്കും തിരുവനന്തപുരത്തേക്കും കോട്ടയത്തേക്കും സൂപ്പർ ഡീലക്സുകളാണ് സർവ്വീസ് നടത്തുക. എല്ലാം പാലക്കാട് സേലം വഴിയാണ് യാത്ര. മൂന്ന് പോയിന്‍റുകളിൽ നിന്നും തിരിച്ചുള്ള യാത്രകളും ഈ റൂട്ടിലൂടെ തന്നെയാണ്.