സംസ്ഥാന കലോത്സവം മൂന്ന് ദിവസമാക്കി ചുരുക്കി

തിരുവനന്തപുരം: ഈ വർഷത്തെ സംസ്ഥാന സ്കൂൾ കലോത്സവം മൂന്ന് ദിവസമാക്കി ചുരുക്കി. പ്രളയത്തിൻെറ പശ്ചാത്തലത്തിൽ ആർഭാടമില്ലാതെ കലോത്സവം നടത്താനാണ് നേരത്തെ തന്നെ തീരുമാനിച്ചിരുന്നത്. ഡിസംബര്‍ 7, 8, 9 തിയതികളില്‍ ആലപ്പുഴയിലാണ് കലോത്സവം നടക്കുക.

രചനാ മത്സരങ്ങൾ ജില്ലാ തലത്തിൽ വരെയായിരിക്കും നടക്കുക. ഇത്തവണത്തെ സ്കൂൾ കായികമേളയും മൂന്ന് ദിവസം മാത്രമായി നടത്താനാണ് തീരുമാനം. ഒക്ടോബർ 26, 27, 28 തിയതികളിലായിരിക്കും കായികമേള നടക്കുക. എല്ലാ മേളകളുടെയും ഉദ്ഘാടന സമാപന സമ്മേളനങ്ങളും ഒഴിവാക്കും.

സ്‌കൂൾ കായികമേള ഈ വർഷം ഒക്ടോബറിൽ തിരുവനന്തപുരത്തും നവമ്പറിൽ കണ്ണൂർ വെച്ച് ശാസ്ത്രോത്സവവും ഒക്ടോബർ അവസാനം കൊല്ലത്ത് വെച്ച് സ്‌പെഷ്യൽ സ്‌കൂൾ കലോത്സവവും നടക്കും. രാത്രി വൈകി മത്സരങ്ങൾ നടക്കുന്നത് പരമാവധി ഒഴിവാക്കും. നിലവിലെ ഗ്രെയ്‌സ് മാർക്ക് സംവിധാനത്തിൽ തന്നെ മുന്നോട്ട് പോകുവാനാണ് തീരുമാനം.