സെമി ഹൈസ്പീഡ് റെയിൽവേ: പ്രാഥമികരൂപരേഖ സമ‍ര്‍പ്പിച്ചു

തിരുവനന്തപുരം: കാസ‍‍ര്‍കോട് മുതല്‍ തിരുവനന്തപരം വരെ അര്‍ധ അതിവേഗ റെയിൽപാത നിര്‍മിക്കാനുള്ള നിര്‍ദേശവുമായി കേരളം. നിലവിലുള്ള റെയിൽ പാതയ്ക്കു മുകളിലൂടെ നിര്‍മിക്കാനുദ്ദേശിക്കുന്ന പാതയുടെ പ്രാഥമികരൂപരേഖ റെയിൽവേ ബോര്‍ഡിന് സമര്‍പ്പിച്ചു. 43000 കോടി രൂപയാണ് പ്രതീക്ഷിക്കുന്ന ചെലവ്. അടുത്ത വര്‍ഷത്തെ റെയിൽവേ വികസനപദ്ധതികളെക്കുറിച്ചുള്ള ആസൂത്രണരേഖയായ പിങ്ക് ബുക്കിൽ പദ്ധതി ഇടംപിടിക്കുമെന്നാണ് സംസ്ഥാന സര്‍ക്കാരിന്‍റെ പ്രതീക്ഷ.

മുഖ്യമന്ത്രി പിണറായി വിജയൻ റെയിൽവേ ബോര്‍ഡ് ചെയര്‍മാൻ അശ്വനി ലൊഹാനിയുമായി നടത്തിയ ചര്‍ച്ചയിലാണ് പുതിയ നിര്‍ദ്ദേശം മുൻപോട്ടു വെച്ചത്. പദ്ധതിക്കു തത്വത്തിൽ അനുമതി നല്‍കിയ ചെയര്‍മാൻ ഡിസംബറിൽ പ്രാഥമിക രൂപരേഖ സമര്‍പ്പിക്കാൻ നിര്‍ദേശിക്കുകയും അടുത്ത വര്‍ഷത്തെ പിങ്ക് ബുക്കിൽ ഉള്‍പ്പെടുത്താമെന്ന് ഉറപ്പു നല്‍കുകയും ചെയ്തിരുന്നു.

മൊത്തം മൂന്നു നിര്‍ദേശങ്ങളാണ് റെയിൽവേയുടെ പങ്കാളിത്തത്തോടെ കേരള റെയിൽവേ ഡവലപ്മെന്‍റ് കോര്‍പ്പറേഷൻ വിദഗ്ധരുടെ നേതൃത്വത്തിൽ തയ്യാറാക്കിയ രൂപരേഖയിലുള്ളത്. 23,000 കോടി രൂപയിൽ നിലവിലുള്ള പാതയ്ക്കു സമാന്തരമായി പുതിയ ഇരട്ടപ്പാത, 43,000 കോടി രൂപ ചിലവിൽ നിലവിലുള്ള പാതയ്ക്കു സമാന്തരമായും വളവുകളും തടസ്സങ്ങളുമുള്ള സ്ഥലങ്ങളിൽ മുകളിലൂടെയും കടന്നു പോകുന്ന പാത, 46,000 കോടി രൂപ ചിലവിൽ പുതിയ അലൈൻമെന്‍റിൽ സ്ഥലം ഏറ്റെടുത്ത് ആകാശപ്പാത എന്നിവയാണ് നിര്‍ദേശങ്ങള്‍. എന്നാൽ പുതിയ അലൈൻമെന്‍റിന് സ്ഥലമേറ്റെടുപ്പ് വെല്ലുവിളിയായേക്കും.