മെയ് 18 മുതൽ ലോട്ടറി വിൽപ്പന ആരംഭിച്ചേക്കും; നറുക്കെടുപ്പ് ജൂൺ 1 മുതൽ

തിരുവനന്തപുരം: കൊവിഡ് പ്രതിസന്ധിയെത്തുടർന്ന് നിർത്തിവെച്ച കേരളത്തിലെ ലോട്ടറി വിൽപ്പന ഈ മാസം 18ന് പുനഃരാരംഭിക്കുമെന്ന് ധനമന്ത്രി തോമസ് ഐസക്ക്. ലോക്ക് ഡൗൺ അവസാനിക്കുന്ന മെയ് 17ന് ശേഷം സാഹചര്യങ്ങൾ കണക്കിലെടുകും അവസാന തീരുമാനമെടുക്കുകയെന്നും പറഞ്ഞ അദ്ദേഹം ഇപ്പോൾ മെയ് 18 മുതൽ വിൽപ്പന പുനരാരംഭിക്കുന്നതിനും ജൂൺ 1 മുതൽ നറുക്കെടുപ്പ് തുടങ്ങുന്നതിനുമാണ് ഭാഗ്യക്കുറി വകുപ്പ് ക്രമീകരണങ്ങൾ നടത്തുന്നതെന്നും അദ്ദേഹം വ്യക്തമാക്കി.

ചെറുകിട വില്‍പനക്കാര്‍ക്ക് 100 ടിക്കറ്റ് വായ്പ നല്‍കും. ഓണത്തിനുമുമ്പ് ഇവയുടെ പണമടച്ചാല്‍ മതിയെന്നും ധനമന്ത്രി പറഞ്ഞു. നേരത്തെ കൊവിഡ് വ്യാപനത്തെ തുടർന്ന് മാർച്ച് മാസം 23 മുതലാണ് ലോട്ടറി വിൽപ്പന നിർത്തിവെച്ചത്. എട്ട് നറുക്കെടുപ്പുകളാണ് സംസ്ഥാനത്ത് മാറ്റിവച്ചതെന്നും ജൂൺ മാസത്തിൽ നടക്കേണ്ടവയടക്കം 95 നറുക്കെടുപ്പുകൾ റദ്ദാക്കിയിട്ടുണ്ടെന്നും തോമസ് ഐസക്ക് ഫേസ്ബുക്ക് പോസ്റ്റിലൂടെ പറഞ്ഞു.

Also Read: ഇനി നിരീക്ഷണത്തിലുള്ളത് 21342 പേര്‍; ചികിത്സയിൽ 37 ആളുകൾ

ഭഗ്യക്കുറി തൊഴിലാളികൾക്ക് അടിയന്തിര ആശ്വാസമെന്ന നിലയിൽ 1000 രൂപ നൽകിയിരുന്നു. 1000 രൂപകൂടി ഒരാഴ്ചയ്ക്കകം തൊഴിലാളികളുടെ അക്കൗണ്ടിൽ ലഭ്യമാക്കുമെന്നും പറഞ്ഞ ധനമന്ത്രി സാവകാശമാണെങ്കിലും ഭാഗ്യക്കുറി വ്യാപാരം പുനരാരംഭിച്ചുകൊണ്ടേ ഇവർക്ക് പൂർണ്ണമായ ആശ്വാസം പകരാനാകൂവെന്നും വ്യക്തമാക്കി.

മോശമായ ടിക്കറ്റുകൾ ഭാഗ്യക്കുറി ഓഫീസിൽ എത്തിച്ചാൽ അവ മാറി അതേ നറുക്കെടുപ്പിനുള്ള പുതിയ ടിക്കറ്റുകൾ നൽകും. നിലവിൽ നറുക്കെടുപ്പ് മാറ്റിവച്ച എട്ട് ടിക്കറ്റുകളുടെ നറുക്കെടുപ്പ് ജൂൺ ഒന്ന് മുതൽ ആഴ്ചയിൽ രണ്ട് നറുക്കെടുപ്പുകളെന്ന ക്രമത്തിൽ നടത്തുവാനാണ് സർക്കാർ ഉദ്ദേശിക്കുന്നത്. തിങ്കൾ, വ്യാഴം ദിവസങ്ങളിലാകും നറുക്കെടുപ്പ് നടക്കുക.

Also Read: കേന്ദ്രം കേരളത്തിലെത്തിക്കുക 80,000 പ്രവാസികളെ മാത്രമെന്ന് വിവരം ലഭിച്ചെന്ന് മുഖ്യമന്ത്രി

ഭാഗ്യക്കുറി വിൽപ്പനയിലൂടെ സർക്കാരിനു ലഭിക്കുന്ന വരുമാനം പൂർണ്ണമായും ആരോഗ്യമേഖലയ്ക്ക് വേണ്ടിയാണ് ചെലവിടുന്നത്. ഇതുകൂടി കണക്കിലെടുത്തുകൊണ്ടാണ് ഭാഗ്യക്കുറി നറുക്കെടുപ്പ് പുനരാരംഭിക്കുവാൻ തീരുമാനിക്കുന്നതെന്നും മന്ത്രി പറഞ്ഞു. പൂർണ്ണമായും കൊവിഡ് പ്രോട്ടോക്കോൾ പാലിച്ചുകൊണ്ടായിരിക്കണം വിൽപ്പനയെന്ന് നിർദേശിച്ച അദ്ദേഹം, വിൽപ്പനക്കാർക്കുള്ള ഓരോ മാസ്കും ഒരു കുപ്പി സാനിട്ടൈസറും ക്ഷേമനിധി ബോർഡ് മുഖാന്തിരം സൗജന്യമായി നൽകുമെന്നും അറിയിച്ചു.