4 ലക്ഷം രൂപയുടെ നോട്ടുമാറാനാവാതെ സത്തായി യാത്രയായി

വരാപ്പുഴ: നോട്ടുനിരോധനം അറിയാതെ സത്തായി എന്ന ഈ വയോധിക സൂക്ഷിച്ചുവെച്ചത് നാല് ലക്ഷം രൂപയുടെ നോട്ടുകള്‍. എന്നാല്‍ നോട്ടുമാറിയെടുക്കാന്‍ കാക്കാതെ സത്തായി ഇപ്പോള്‍ നിരോധനമില്ലാത്ത ലോകത്തേക്ക് യാത്രയായിരിക്കയാണ്. നാല് ലക്ഷം രൂപയുടെ നിരോധിച്ച നോട്ടുകള്‍ കൈവശം വെച്ചതിലൂടെ വാര്‍ത്തയിലിടം നേടിയ വരാപ്പുഴ ചിറയ്ക്കകം ഭഗവതി പറമ്പില്‍ സത്തായിയെന്നു വിളിക്കുന്ന സതിബായ് (82) ആണ് വ്യാഴാഴ്ച രാത്രി 10 മണിയോടെ മരിച്ചത്.

വാര്‍ദ്ധക്യസഹജമായ അസുഖത്തെ തുടര്‍ന്ന് എറണാകുളം ജനറല്‍ ആശുപത്രിയില്‍ ചികിത്സയിലായിരുന്നു. ഭര്‍ത്താവും മകളും വര്‍ഷങ്ങള്‍ക്ക് മുമ്ബുതന്നെ മരിച്ചതോടുകൂടിയാണ് സത്തായി പുറം ലോകവുമായി ബന്ധമില്ലാതെ കഴിയാന്‍ തുടങ്ങിയത്. ആരും സംരക്ഷിക്കാനില്ലാത്തതിനെ തുടര്‍ന്ന് ആഴ്ചകള്‍ക്ക് മുമ്ബാണ് അവശനിലയിലായ സത്തായിയെ പഞ്ചായത്ത് അധികൃതരെത്തി വരാപ്പുഴയിലെ സ്നേഹ ഭവനിലേക്ക് മാറ്റിയത്. തുടര്‍ന്ന് ചികിത്സയ്ക്കായി ഒരാഴ്ച മുമ്ബാണ് എറണാകുളം ജനറല്‍ ആശുപത്രിയില്‍ പ്രവേശിപ്പിച്ചത്.

മൃഗസംരക്ഷണ വകുപ്പില്‍ നിന്ന് വിരമിച്ച ശേഷം ചിറയ്ക്കകത്തെ വീട്ടില്‍ തനിച്ചായിരുന്നു താമസം. ഇവര്‍ക്ക് വിരമിക്കുമ്പോള്‍ ലഭിച്ചതും പെന്‍ഷനുമടക്കമുള്ള തുകയായിരുന്നു വീട്ടില്‍ സൂക്ഷിച്ചിരുന്നത്. അയല്‍വാസികളോടും ഇവര്‍ ഒരുതരത്തിലുള്ള അടുപ്പവും കാണിച്ചിരുന്നില്ല. വൈദ്യുതിപോലും വിച്ഛേദിക്കപ്പെട്ട നിലയിലാണ് കഴിഞ്ഞിരുന്നത്. ആകെ പുറത്തിറങ്ങിയിരുന്നത് വല്ലപ്പോഴും വരാപ്പുഴ മാര്‍ക്കറ്റില്‍ പോയി സാധനങ്ങള്‍ വാങ്ങി വരുന്നതാണ്.

പുറംലോകവുമായി യാതൊരു ബന്ധവുമില്ലാത്തതിനാല്‍ തന്നെ നോട്ട് നിരോധിച്ച കാര്യവും സത്തായി അറിഞ്ഞിരുന്നില്ല. വരാപ്പുഴ മാര്‍ക്കറ്റിലെത്തി സാധനങ്ങള്‍ വാങ്ങുന്നതിനായി ആയിരത്തിന്റെ നോട്ട് നല്‍കിയപ്പോഴാണ് നോട്ട് നിരോധിച്ച കാര്യം ഇവര്‍ അറിയുന്നത് തന്നെ. പിന്നീട് പഞ്ചായത്ത് അധികൃതരും പോലീസുമെത്തി സത്തായിയുടെ വീട്ടില്‍ നടത്തിയ പരിശോധനയിലാണ് വീട്ടിലെ സ്റ്റീല്‍ അലമാരയില്‍ പ്ലാസ്റ്റിക് കവറിലാക്കി സൂക്ഷിച്ചിരുന്ന നാല് ലക്ഷം രൂപയുടെ ആയിരത്തിന്റെയും അഞ്ഞൂറിന്റെയും നോട്ടുകള്‍ കണ്ടെത്തിയത്.

എന്നാല്‍ നോട്ട് മാറിയെടുക്കുന്നതിനുള്ള സമയം കഴിഞ്ഞതിനാല്‍ സത്തായിയില്‍ നിന്നു കണ്ടെത്തിയ നോട്ടുകള്‍ മാറിക്കിട്ടിയുമില്ല. മാസങ്ങള്‍ക്ക് മുമ്പ് പഞ്ചായത്ത് അധികൃതരുടെ നേതൃത്വത്തില്‍ ചൈന്നെയില്‍ പോയി നോട്ട് മാറുന്നതിനായുള്ള ശ്രമം നടത്തിയെങ്കിലും അതും വിജയിച്ചില്ല. ഒടുവില്‍ കേന്ദ്ര ധനകാര്യ മന്ത്രാലയത്തിന് അപേക്ഷ നല്‍കി കാത്തിരിക്കുന്നതിനിടെയാണ് സത്തായി മരിച്ചത്.മൃതദേഹം വെള്ളിയാഴ്ച രാവിലെ 10 മണിക്ക് സംസ്ക്കരിച്ചു.

kerala woman who didnt know about demonetisation dies

kerala woman who didnt know about demonetisation dies hard earned rs 4 lakh left unchanged.