സദാചാര ഗുണ്ടായിസത്തിന് ഇരയായ യുവാവ് ആത്മഹത്യ ചെയ്‍തു

മലപ്പുറം: മലപ്പുറം കുറ്റിപ്പാലയില്‍ യുവാവ് ആത്മഹത്യ ചെയ്‍തു. സദാചാര ഗുണ്ടായിസത്തിന് ഇരയായ മനോവിഷമമാണ് മരണത്തിലേക്ക് നയിച്ചതെന്ന് ബന്ധുക്കള്‍ ആരോപിച്ചു. മുഹമ്മദ് സാജിദ് എന്നയാളാണ് മരിച്ചത്.

കഴിഞ്ഞ തിങ്കളാഴ്‍ച്ച രാത്രി ഇയാളെ ഒരുകൂട്ടം ആളുകള്‍ തടഞ്ഞുവക്കുകയും കയറിട്ട് കെട്ടി മൊബൈല്‍ഫോണില്‍ ചിത്രങ്ങളെടുക്കുകയും ചെയ്‍തതായി സാജിദിന്‍റെ വീട്ടുകാര്‍ പറഞ്ഞു. മൊബൈല്‍ഫോണ്‍ ദൃശ്യങ്ങള്‍ ഇന്നലെ വാട്ട്‍സാപ്പിലൂടെ പ്രചരിച്ചിരുന്നു. ഇതില്‍ സാജിദ് ദുഖിതനായിരുന്നു.

ചൊവ്വാഴ്‍ച്ച പോലീസ് സ്റ്റേഷനില്‍ എത്തി കാര്യങ്ങള്‍ അന്വേഷിച്ചിരുന്നതായി സാജിദിന്‍റെ സഹോദരന്‍ ഏഷ്യാനെറ്റ് ന്യൂസിനോട് പറഞ്ഞു. എന്നാല്‍ പോലീസ് മോശമായാണ് പെരുമാറിയത്. പരാതിയെല്ലെന്നായിരുന്നു പോലീസ് പറഞ്ഞത്.

പോസ്റ്റ് മോര്‍ട്ടം നടപടികള്‍ക്കായി കോഴിക്കോട് മെഡിക്കല്‍ കോളേജിലേക്ക് മൃതദേഹം മാറ്റിയിരിക്കുകയാണ്. പോലീസിന്‍റെ പ്രതികരണം ഇതുവരെ ലഭിച്ചിട്ടില്ല.