ചര്‍ക്കയുമായി പരസ്യം; മോഹൻലാലിന് വക്കീല്‍ നോട്ടീസ്

തിരുവനന്തപുരം: പൊതുജനങ്ങള്‍ക്ക് തെറ്റായ സന്ദേശം നല്‍കിയ പരസ്യത്തില്‍ അഭിനയിച്ചതിന് മോഹന്‍ലാലിനെതിരെ ഖാദി ബോര്‍ഡ് നിയമനടപടിക്ക്. ചര്‍ക്കയുമായി യാതൊരു ബന്ധവുമില്ലാത്ത വ്യാപാര സ്ഥാപനത്തിനുവേണ്ടിയുള്ള പരസ്യത്തില്‍ ചര്‍ക്കയില്‍ നൂല്‍നൂറ്റുകൊണ്ട് അഭിനയിച്ചതിന് താരത്തിന് വക്കീൽ നോട്ടീസ് അയച്ചിരിക്കുകയാണ്.

നിയമനടപടികള്‍ ആരംഭിച്ചതായി ഖാദി ബോര്‍ഡ് വൈസ് ചെയര്‍മാന്‍ ശോഭനാജോര്‍ജ് അറിയിച്ചു. ഖാദിമേളയോടനുബന്ധിച്ച്‌ കണ്ണൂരിലെത്തിയപ്പോഴായിരുന്നു ഇക്കാര്യം സംസാരിച്ചത്.ചര്‍ക്കയുമായി ഒരു ബന്ധവുമില്ലാത്ത വ്യാപാര സ്ഥാപനത്തിനുവേണ്ടിയാണ് മോഹന്‍ലാല്‍ ദേശത്തിന്റെ പ്രതീകമായ ചര്‍ക്ക വെച്ച്‌ പരസ്യം ചെയ്തതെന്നും അവര്‍ കുറ്റപ്പെടുത്തി. പരസ്യത്തില്‍ നിന്ന് പിന്മാറണമെന്നാവശ്യപ്പെട്ട് ആദ്യപടിയായി വക്കീല്‍ നോട്ടീസ് അയച്ചിട്ടുണ്ടെന്നും ആ സ്ഥാപനത്തിനെതിരെയും നടപടി സ്വീകരിക്കുമെന്നും ശോഭനാജോര്‍ജ് കൂട്ടിച്ചേര്‍ത്തു.