സ്കൂള്‍ വാൻ അപകടം: ചികിത്സയിലിരുന്ന കുട്ടി മരിച്ചു

കൊച്ചി: മരട് കാട്ടിത്തറ റോഡിൽ സ്കൂള്‍ വാൻ ക്ഷേത്രക്കുളത്തിലേയ്ക്ക് മറിഞ്ഞുണ്ടായ അപകടത്തിൽപ്പെട്ട് ചികിത്സയിലായിരുന്ന കുട്ടി മരിച്ചു. ഇതോടെ അപകടത്തിൽ മരിച്ചവരുടെ എണ്ണം നാലായി. നാലുവയസുകാരിയായ കരോളിൻ ജോബിയാണ് മരിച്ചത്.

യുകെജി വിദ്യാര്‍ഥികളായ ആദിത്യൻ (നാല്), വിദ്യാലക്ഷ്മി (നാല്), ആയ ലത ഉണ്ണി (38) എന്നിവരാണ് ജൂൺ 11നുണ്ടായ അപകടത്തിൽ മരിച്ചത്. അപകടത്തിൽ ഗുരുതരമായി പരിക്കേറ്റ കരോളിന്‍ ആശുപത്രിയിൽ ചികിത്സയിലായിരുന്നു. രക്ഷാപ്രവര്‍ത്തനത്തിനുശേഷം ബോധമറ്റുവീണ ഡ്രൈവര്‍ അനിൽകുമാറും എറണാകുളം മെ‍ഡിക്കൽ ട്രസ്റ്റ് ആശുപത്രിയിൽ ചികിത്സയിലാണ്.

വൈകിട്ട് നാലരയോടെ കാട്ടിത്തറ റോഡ് ഹരിശ്ചന്ദ്ര ലെയ്നിൽ തെക്കേടത്ത് കാവിനടുത്തുള്ള കുളത്തിലേയ്ക്ക് മറിഞ്ഞ വാഹനത്തിൽ എട്ടു കുട്ടികളും ഡ്രൈവറും ആയയുമാണ് ഉണ്ടായിരുന്നത്. ഇടതുവശത്തേയ്ക്കുള്ള വളവ് തിരിയുന്നതിനിടെ വലത്തേയ്ക്ക് പാളിയ വാഹനം പുല്ലിൽ തെന്നി സാവധാനം കുളത്തിലേയ്ക്ക് മറിയുകയായിരുന്നു.

ഓടിയെത്തിയ നാട്ടുകാരും ഡ്രൈവറും ചേര്‍ന്ന് ആറുകുട്ടികളെ രക്ഷിച്ചു. എന്നാൽ വാഹനം ഉയര്‍ത്തിയ ശേഷം മാത്രമേ വിദ്യാലക്ഷ്മിയെയും ആദിത്യനെയും ലതയെയും പുറത്തെടുക്കാനായുള്ളൂ. അപ്പോഴേയ്ക്കും അരമണിക്കൂര്‍ പിന്നിട്ടിരുന്നു.