ആപ്പ്ജില്ല

പാവം വവ്വാലിനെ തല്ലിക്കൊന്നാൽ നിപ വൈറസ് പോകുമോ?

വവ്വാലുകളെ ഓടിക്കാനും കൊല്ലാനും ശ്രമിക്കുന്നത് സ്ഥിതി ഗുരുതരമാക്കുമെന്ന് വിദഗ്ധര്‍

Samayam Malayalam 24 May 2018, 12:55 pm
കോഴിക്കോട്: നിപ വൈറസ് പരത്തുന്നതിനു പിന്നിൽ വവ്വാലുകളാണെന്ന പ്രചാരണത്തോടെ വവ്വാലുകളെ ഉപദ്രവക്കുന്നതും കൊല്ലുന്നതും വര്‍ദ്ധിച്ച സാഹചര്യത്തിൽ മുന്നറിയിപ്പുമായി ആരോഗ്യവകുപ്പ്. വവ്വാലുകളെ കൊന്നെടുക്കുന്നത് കൂടുതൽ പ്രശ്നങ്ങള്‍ ഉണ്ടാക്കാനാണ് വഴിയൊരുക്കുക എന്നാണ് ആരോഗ്യവകുപ്പ് വിശദീകരിക്കുന്നത്. വവ്വാലുകലാണ് രോഗം പരത്തുന്നത് എന്ന് ഇതുവരെ സ്ഥിരീകരിച്ചിട്ടുമില്ല.
Samayam Malayalam bat


കായ്‍‍കനികളും മറ്റും ഭക്ഷിക്കുന്ന വവ്വാലുകളാണ് സാധാരണഗതിയിൽ നിപ വൈറസ് പരത്തുന്നത്. എന്നാൽ വൈറസ് ബാധ ഏറ്റവുമാദ്യം റിപ്പോര്‍ട്ട് ചെയ്ത പന്തിരിക്കയിലെ കിണറ്റിൽ കണ്ടെത്തിയത് കീടങ്ങളെ ഭക്ഷിക്കുന്ന ചെറിയ വവ്വാലുകളാണ്. വീടുകളിൽ സാധാരണയായി കണ്ടുവരുന്നതും ഇത്തരം വവ്വാലുകളാണ്.

എന്നാൽ നിപ വൈറസ് പരത്താൻ സാധ്യതയുള്ള വലുപ്പമേറിയ വവ്വാലുകല്‍ വലിയ കോളനികളായാണ് താമസിക്കുന്നത്. ഇവയെ ഒഴിവാക്കാൻ ശ്രമിക്കുന്നത് അപകടമാണെന്ന് കേന്ദ്ര മൃഗസംരക്ഷണവകുപ്പ് കമ്മീഷണര്‍ ഡോ. സുരേഷ് എസ് ഹൊണ്ണപഗോൽ പറഞ്ഞു.

വവ്വാലുകളെ ഓടിക്കാനും കൊല്ലാനും ശ്രമിക്കുന്നത് അപകടകരമാണ്. ഇവയുടെ വിസര്‍ജ്യവും ശരീരസ്രവങ്ങളും ശരീരത്തിലാകാനുള്ള സാധ്യത വളരെയേറെയാണ്. കൂടാതെ വാസസ്ഥലത്തു നിന്ന് അവയെ ഓടിച്ചാൽ രോഗവാഹകരായ വവ്വാലുകള്‍ മറ്റു പ്രദേശങ്ങളിലെത്തി രോഗം പരത്താനുള്ള സാധ്യതയുമുണ്ടെന്ന് വിദഗ്ധര്‍ മുന്നറിയിപ്പ് നല്‍കുന്നു.

വവ്വാലുകള്‍ കടിച്ചതോ അവയുടെ വിസര്‍ജ്യം പറ്റിയതോ ആയ പഴവര്‍ഗങ്ങള്‍ കഴിക്കാതിരിക്കുകയാണ് രോഗം പകരാതിരിക്കാൻ ഏറ്റവും മികച്ച മാര്‍ഗം.

വൈറസ് വളര്‍ത്തുമൃഗങ്ങളിലേയ്ക്ക് പകരാതിരിക്കാനും പ്രത്യേകശ്രദ്ധ നല്‍കണം.നിലവിൽ സമീപത്തെ വളര്‍ത്തുമൃഗങ്ങളിൽ വൈറസ് ബാധ റിപ്പോര്‍ട്ട് ചെയ്തിട്ടില്ല. പന്നികളിലേയ്ക്ക് വൈറസ് പകര്‍ന്നാൽ സ്ഥിതി ഗുരുതരമാകും. രോഗബാധയുണ്ടായ സ്ഥലത്ത് 15 കിലോമീറ്റര്‍ ചുറ്റളവിൽ ഫാമുകളൊന്നുമില്ലെന്നത് ആശ്വാസമാണ്. പ്രദേശത്തെ പശു, ആട്, പന്നി എന്നിവയുടെയും രക്തസാമ്പിളുകള്‍ ശേഖരിച്ചിട്ടുണ്ട്.

എന്നാൽ വളര്‍ത്തുമൃഗങ്ങളിൽ എന്തെങ്കിലും തരത്തിലുള്ള മാറ്റങ്ങള്‍ കണ്ടാൽ അതീവശ്രദ്ധ കൊടുക്കണം. മൃഗങ്ങളുമായി ഇടപഴകുമ്പോള്‍ കൈയുറയും മാസ്കും ഉപയോഗിക്കണം. മൃഗങ്ങളിൽ ശ്വാസകോശസംബന്ധമായ രോഗലക്ഷണങ്ങള്‍, വിഭ്രാന്തി തുടങ്ങിയവ കണ്ടാൽ മൃഗാശുപത്രിയുമായി ബന്ധപ്പെടണം. വൃക്തിശുചിത്വം ഉറപ്പാക്കണം.

വളര്‍ത്തുമൃഗങ്ങളിൽ രോഗം വ്യാപിക്കുന്ന സാഹചര്യം ഇപ്പോഴില്ലെന്നും കര്‍ഷകര്‍ ആശങ്കപ്പെടേണ്ടെന്നും കോഴിക്കോട് ജില്ലാ മൃഗസംരക്ഷണ ഓഫീസര്‍ അറിയിച്ചിട്ടുണ്ട്.

ആര്‍ട്ടിക്കിള്‍ ഷോ

ട്രെൻഡിങ്