ബ്രൂവറിക്കായി കിൻഫ്ര ഭൂമി നൽകിയിട്ടില്ല: വ്യവസായ മന്ത്രി

തിരുവനന്തപുരം: ബ്രൂവറിക്കായി കിൻഫ്ര ഭൂമിയിൽ സ്ഥലം അനുവദിച്ചിട്ടില്ലെന്ന് വ്യവസായ മന്ത്രി ഇ പി ജയരാജൻ. ബ്രൂവറിക്കായി അനുവദിക്കാത്ത ഭൂമിയുടെ പേരിലാണ് ഇപ്പോൾ വിവാദം ഉണ്ടാക്കുന്നതെന്നും മന്ത്രി പറഞ്ഞു.

വ്യവസായം ആരംഭിക്കുന്നതിനായി സ്ഥലം ഒരുക്കി നൽകുന്നതിനുള്ള ഇടമാണ് കിൻഫ്ര. വ്യവസായം ആരംഭിക്കുന്ന ഏതൊരാൾക്കും കിൻഫ്രയിൽ ഭൂമി ലഭ്യമാണോ എന്ന് അന്വേഷിക്കാനാകും. സ്ഥലത്തിനായി അപേക്ഷിക്കുന്നവർക്ക് സ്ഥലം ലഭ്യമാണെങ്കിൽ കിൻഫ്ര നേരിട്ട് അറിയിക്കുന്നതാണ് പതിവ്. ലൈസൻസുള്ള വ്യവസായമാണെങ്കിൽ നടപടി ക്രമങ്ങളനുസരിച്ച് ഭുമി അനുവദിക്കുകയാണ് ചെയ്യുക. ബ്രൂവറി തുടങ്ങാൻ കിൻഫ്ര വക ഭൂമിയിൽ സ്ഥലം അനുവദിച്ചുവെന്ന് പറയുന്നത് അടിസ്ഥാനരഹിതമാണെന്നും ഇ പി ജയരാജൻ പറഞ്ഞു.

അതേസമയം, ബ്രൂവറി വിഷയത്തിൽ ആരോപണമുന്നയിച്ച പ്രതിപക്ഷ നേതാവ് രമേശ് ചെന്നിത്തലയ്ക്ക മറുപടിയുമായി എക്സൈസ് മന്ത്രി ടി പി രാമകൃഷ്ണൻ രംഗത്തെത്തിയിരുന്നു. ആരോപണം ഉന്നയിച്ചവർത്തന്നെയാണ് അത് തെളിയിക്കേണ്ടതെന്നാണ് മന്ത്രിയുടെ നിലപാട്. യുഡിഎഫിന്റെ ശീലംവെച്ച് എൽഡിഎഫിനെ അളക്കരുതെന്നും എൽഡിഎഫിന്റെ മദ്യനയം അനുസരിച്ചാണ് ബ്രൂവറികൾക്ക് അനുമതി നൽകിയതെന്നും എക്സൈസ് മന്ത്രി പറഞ്ഞു. ചെന്നിത്തല ഉന്നയിച്ച ആരോപണങ്ങളിൽ വിശദീകരണം ആവശ്യമുള്ള ചോദ്യങ്ങൾക്ക് പിന്നീട് മറുപടി പറയുമെന്നും അദ്ദേഹം വ്യക്തമാക്കി.