വോട്ട് ചെയ്യാനെത്തിയപ്പോൾ ആക്രമിക്കപ്പെട്ട ദമ്പതികൾക്ക് ഒരു ലക്ഷം രൂപ നൽകി ട്വന്റി-20

കൊച്ചി: തദ്ദേശ സ്വയംഭരണ തെരഞ്ഞെടുപ്പിൽ വോട്ട് ചെയ്യാനെത്തിയപ്പോൾ ആക്രമിക്കപ്പെട്ട ദമ്പതികൾക്ക് ഒരു ലക്ഷം രൂപ നൽകി ട്വന്റി-20. വോട്ടേഴ്സ് ലിസ്റ്റിൽ പേരില്ലെന്നാരോപിച്ച് സിപിഎം പ്രവർത്തകരാണ് തങ്ങളെ ആക്രമിച്ചതെന്ന് ദമ്പതികൾ ആരോപിക്കുന്നു.

ദമ്പതികളെ ആക്രമിക്കുന്ന വീഡിയോ സമൂഹമാധ്യമങ്ങളിൽ വൈറലായിരുന്നു. കിഴക്കമ്പലം പഞ്ചായത്തിലെ കുമ്മനോട് വാർഡിൽ വോട്ട് ചെയ്യാനെത്തിയപ്പോഴായിരുന്നു ദമ്പതികൾ ആക്രമണം നേരിട്ടത്. പോലീസ് സഹായത്തോടെയാണ് ദമ്പതികൾക്ക് വോട്ട് ചെയ്യാനായത്.

ആക്രമണം നേരിട്ടിട്ടും വോട്ട് ചെയ്യാൻ മനസാന്നിധ്യം കാണിച്ച ദമ്പതികളായ പ്രിന്റു-ബ്രിജീത്ത ദമ്പതികളെയാണ് അന്നാ-കിറ്റക്സ് എംഡി സാബു ജേക്കബിന്റെ നേതൃത്വത്തിൽ ആദരിച്ചത്.

കിഴക്കമ്പലത്തിനു പുറത്ത് മൂന്ന് പഞ്ചായത്തുകൾകൂടിയാണ് ട്വന്റി-20 പിടിച്ചെടുത്തത്. ദമ്പതികൾ ട്വന്റി-20 യുടെ വളർച്ചയുടെ പ്രതീകമാണെന്നും ഈ സംഭവത്തിലെ മധുര പ്രതികാരമാണ് കിഴക്കമ്പലത്തിനു പുറമേ സമീപ പ്രദേശങ്ങളിൽ ലഭിച്ച ഉജ്വല വിജയമെന്നും ട്വന്റി-20 പ്രസ്താവനയിൽ പറഞ്ഞു.