വടകരയിൽ കെകെ രമ തന്നെയെന്ന് ചെന്നിത്തല; നടക്കാൻ പോകുന്നത് ശക്തമായ പോരാട്ടമോ?

കഴിഞ്ഞതവണ യുഡിഎഫ് അനുവദിച്ച സീറ്റിൽ ജെഡിയു സ്ഥാനാർഥിയായി മത്സരിച്ച് പരാജയപ്പെട്ട മനയത്ത് ചന്ദ്രനാണ് ഇത്തവണ വടകരയിൽ എൽഡിഎഫ് സ്ഥാനാർഥി. എൽജെഡി സ്ഥാനാർഥിയായാണ് മനയത്ത് ചന്ദ്രൻ ജനവിധി തേടുന്നത്. കഴിഞ്ഞതവണ ഇടതുമുന്നണിയ്ക്കായി വടകരയിൽ മത്സരിച്ചത് ജെഡിഎസ് നേതാവ് സികെ നാണുവായിരുന്നു. എൽജെഡി മുന്നണിയിലേക്ക് വന്നതോടെയാണ് ജെഡിഎസിന് സിറ്റിങ്ങ് സീറ്റ് വിട്ട് നൽകേണ്ടി വന്നത്. 9,511 വോട്ടിനായിരുന്നു 2016ൽ ഇടതു മുന്നണി വടകരയിൽ വിജയിച്ചത്.

ജെഡിഎസും എൽജെഡിയും രണ്ട് മുന്നണികളിലായിരിക്കെയാണ് 2016ലെ നിയമസഭാ തെരഞ്ഞെടുപ്പ് നടക്കുന്നത്. എൽജെഡി അന്ന് ജെഡിയു ആയിരുന്നു. ഇടതുപക്ഷത്തിനായി ജെഡിഎസിലെ സികെ നാണുവും വലതുപക്ഷത്തിനായി ഇന്നത്തെ എൽജെഡിയിലെ മനയത്ത് ചന്ദ്രനുമാണ് മത്സരിച്ചത്. ബിജെപിയ്ക്കായി എം രാജേഷ് കുമാറും മത്സരത്തിനിറങ്ങി. ആർഎംപിയ്ക്കും വടകരയിൽ സ്ഥാനാർഥിയുണ്ടായിരുന്നു. ടിപി ചന്ദ്രശേഖരന്‍റെ ഭാര്യ കെകെ രമയായിരുന്നു ആർഎംപിയ്ക്കായി കഴിഞ്ഞതവണ മത്സരിച്ചത്.

2016ലെ തെരഞ്ഞെടുപ്പ് ഫലം പുറത്തുവന്നപ്പോൾ സികെ നാണു 9,511 വോട്ടിനാണ് വിജയിച്ചത്. യുഡിഎഫ് സ്ഥാനാർഥിയായിരുന്ന മനയത്ത് ചന്ദ്രൻ രണ്ടാമതും കെകെ രമ മൂന്നാമതും എത്തി. ബിജെപി സ്ഥാനാർഥി നാലാം സ്ഥാനത്തേക്ക് പിന്തള്ളപ്പെടുകയും ചെയ്തു. ഒരു മുന്നണിയുടെയും ഭാഗമാകാതെ മത്സരിച്ചായിരുന്നു ആർഎംപി കഴഞ്ഞതവണ മൂന്നാം സ്ഥാനത്തെത്തിയത്. സികെ നാണുവിന് 49,211 വോട്ടുകളും മനയത്ത് ചന്ദ്രന് 39,700 വോട്ടുകളും ലഭിച്ചപ്പോൾ കെകെ രമയ്ക്ക് 20,504 വോട്ടുകളാണ് കിട്ടിയത്.

വടകരയിൽ ആർഎംപിയുടെ വോട്ടുകൾ ആർക്ക് ലഭിക്കുമെന്നത് ഫലത്തെ സ്വാധീനിച്ചേക്കും. ജെഡിഎസും എൽജെഡിയും ഇടതു മുന്നണിയുടെ ഭാഗമായി തെരഞ്ഞെടുപ്പിനെ നേരിടുമ്പോൾ യുഡിഎഫിന് ആർഎംപിയെ കൂടെ നിർത്താതെ ജയം നേടുക പ്രയാസമാകും എന്നാണ് വിലയിരുത്തപ്പെടുന്നത്. ആർഎംപി സ്ഥാനാർഥിയായി കെകെ രമ എത്തിയാൽ ജയം നേടാനാകുമെന്ന പ്രതീക്ഷയിലാണ് യുഡിഎഫ് ക്യാമ്പ്. എന്നാൽ എൽജെഡിയുടെ വോട്ടുകൾ ലഭിക്കുന്നതിലൂടെ ആർഎംപി- യുഡിഎഫ് കൂട്ടുകെട്ടിനെ മറികടക്കാനാകുമെന്ന പ്രതീക്ഷയിലാണ് എൽഡിഎഫ്.